Нефть тээвэрлэх зам, нефтийн орд газруудаа хааснаас Ливи улс 931 сая ам.долларын алдагдал хүлээж байна гэж Ливийн нефтийн үндэсний корпорац (NOC) мягмар гарагт мэдээлжээ. Тус улсын хоногт олборлодог нефтийн хэмжээ 187 мянган баррель болтлоо буурсан байна. “Триполийн болон өмнөд нутгийн агуулахуудад түлш хомсдоод байгаа бол төрийн болон өмнөдийн зарим бүсэд одоохондоо хүрэлцээтэй байна” гэж NOC-ын мэдэгдэлд дурджээ. Улс оронд нь дизель түлшний нөөц ердөө хэдхэн хоногоор хэмжигдэж байгаа учраас нефтийн орд газрууд болон усан боомтуудыг блоклохоо зогсоохыг корпорацын удирдлагууд уриалсан байна.
Ливийн үндэсний армийн хяналтад байсан нефть тээврийн гол замыг өнгөрөгч 2019 оны арванхоёрдугаар сарын 18-нд хаасан. Үүний дараа өдөр Эль-Филиэс холгүй оршиж, хоногт дунджаар 400 мянган баррель нефть олборлодог Эш-Шарарын орд газрыг бас хаасан байна. Ингэснээр Ливийн нефтийн үйлдвэрлэл үндсэндээ зогсоод байгаа юм. Ливийн үндэсний армийн албан ёсны төлөөлөгч Ахмед аль-Мисмари энэ тухайд армийн командлал нефтийн орд газруудыг өөрсдөө хаагаагүй, харин бүхий л орлогыг нь Фаиз Сарраж тэргүүтэй Үндэсний зөвшилцлийн Засгийн газрын хяналтад байгаа Триполи дахь төв банк хамж аваад байна гэсэн иргэдийн гомдлын улмаас хаасан гэж үүний өмнө мэдэгдсэн.