Нэгдсэн улс руу чиглэсэн хууль бус цагаачдын урсгалыг зогсоохгүй бол америкийн компаниудыг Мексикээс гаргана гэж АНУ-ын Ерөнхийлөгч Дональд Трамп мэдэгдсэн байна. “Хил дээрх ханын тухай ярилцахаар Мексик олон хүний бүрэлдэхүүнтэй төлөөлөгч илгээжээ. Энэ тухай 25 жил ярьж байна. Харин бид яриа биш, үйл ажиллагаа л хүсч байна. Уг нь тэд хүсвэл хил дээрх энэ хямралыг нэг л өдөр шийдчихэж чадна. Эс тэгвэл манай компаниуд ажлаа зогсоогоод АНУ-даа эргэн ирэх болно” гэж Трамп Twitter-тээ бичжээ.

АНУ руу чиглэсэн хууль бус цагаачдын урсгалаас болоод Дональд Трамп мексикийн бараа бүтээгдэхүүний гаалийн татварыг таван хувиар нэмэгдүүлсэн юм. Тэгээд зогсохгүй Мексик цагаачлалын энэ хямралыг зогсоох талаар үр дүнтэй арга хэмжээ авахгүй бол гаалийн татвараа аравдугаар сарын 1-нийг хүртэл, 25 хувь болтол нь сар бүр таван хувиар нэмнэ гэсэн юм. Тэгээд Мексик өөрийн нутаг дахь хууль бус цагаачдын урсгалаа шийдэхгүй юм бол Мексикийн бараа бүтээгдэхүүнд ногдуулах гаалийн татвар 25 хувь хэвээрээ үлдэх болно гэж Цагаан ордны тараасан Трампын мэдэгдэлд дурджээ.
Мексикээр дамжин АНУ-д ирж байгаа хууль бус цагаачдын урсгалыг зогсоохын тулд хил дээрээ хана барина гэж Дональд Трамп сонгуулийн кампанит ажлын үеэр амласнаа хэрэгжүүлэх гэж энэ оны төсөвт 6.4 тэрбум доллар тусгуулахаар конгрессоос хүссэн юм. Үүнийгээ батлуулахын тулд Мексиктэй хиллэдэг хил дээр онц байдал зарлаж байлаа.