Ираны шашны тэргүүн, удирдагч Али Хаменеи Вашингтоны санал болгож байгаа Израиль, Палестины хурцадмал байдлыг тогтворжуулах “Зууны хэлэлцээр” гэж нэрлэсэн төлөвлөгөөг хэрэгжүүлэхээс өмнө АНУ-ын Ерөнхийлөгч Дональд Трамп үхнэ гэж хэлсэн бичлэгээ лхагва гарагт өөрийнхөө Twitter хуудсандаа байрлуулжээ. Тэрбээр хэлсэн үгэндээ Америкийн төлөвлөгөөг “харгис, тэнэг, сүйрэлд хүргэх” төлөвлөгөө гэж нэрлэсэн байна. Энэ төлөвлөгөөг залруулахын тулд исламын фронт палестинчуудын эрэлхэг тэмцлийг дэмжих хэрэгтэй” гэж Али Хаменеи онцолжээ.
 АНУ-ын Ерөнхийлөгч Дональд Трамп өнгөрөгч нэгдүгээр сарын 28-нд Израилийн Ерөнхий сайд Биньямин Нетаньяхутай уулзахдаа Израиль-Палестины сөргөлдөөнийг тогтворжуулах зууны хэлэлцээр гэж нэрлэсэн энхийн төлөвлөгөөг хоёр улсын харилцан зөвшөөрсний үндсэн дээр хэрэгжүүлнэ гэж зарласан. Вашингтон үүний тулд Газын зурвас, Иордан голын баруун эргийг Палестины нутагтай хурдны замаар холбож Дорнод Иерусалимын хэсгийг Арабын улсын нийслэл болгохоор ярьжээ. Нетаньяхугийнхаар бол энэ нь Иерусалимын Абу-Дисийг хэлж байгаа бололтой. Үүний зэрэгцээ Цагаан ордны тэргүүн бүх Иерусалимийг Израилийн “хуваагдашгүй нийслэл” гээд еврейн бүх сууринг Израилийн газар нутаг гэсэн байна.