Украины агаарын тээврийн “Украины олон улсын агаарын шугам” компанийн Boeing 737 онгоцыг Тегераны нисэх буудлаас хөөрсний дараа Ираны цэргийнхэн пуужингаар харван сөнөөсний төлөө Канадын хуульчид хохирлын нөхөн төлбөр хэмээн Иранаас нэг тэрбум ам.доллар нэхэмжилснээ Торонтогийн шүүхэд өгсөн байна хэмээн Reuters хэвлэл мэдээлжээ.
Нэхэмжлэлд 1.5 тэрбум канад доллар хэмээн бичсэн нь 1.1 тэрбум ам.доллартай тэнцэж байгаа юм. Мэдээллийн агентлагийн дамжуулсан мэдээнд дурдсанаар бол үүний хариуцагч нь Иран улс, тэдний шашны тэргүүн Али Хаменеи, Исламын хувьсгалын корпус, бусад албаны хүмүүс гэнэ. Гол нэхэмжлэгч нь ослын үеэр амь үрэгдсэн нэгний ойрын хамаатан гэсэн боловч нэрийг нь дурдаагүй байна. Нэхэмжлэлд Украины онгоцны энэ сүйрэл бол урьдчилан төлөвлөсөн террорист дайралт гэж тэмдэглэжээ.
Нэгдүгээр сарын 8-нд Тегераны олон улсын нисэх буудлаас Киевийг зорин хөөрсөн Boeing 737 онгоцонд 168 зорчигч явсны 82 нь иран, 63 нь Канадын иргэн байсан бол 10 швед, 11 украин, дөрвөн афган, тус бүр гурван герман, британи хүн байсан юм.
Энэ сүйрлийг эхлээд онгоцны техникийн бүрэн бус байдлаас болсон гэж байсан ч хэд хоногийн дараа Ираны тал цэргийнхний алдаанаас болоод пуужингаар харваж сөнөөснөө хүлээж, алдаа гаргасан цэргийн албан хаагчийг шоронд хийлээ гэж мэдэгдсэн юм.
Иран улс амь үрэгдсэн украин иргэдийн ар гэрт 80 мянган ам.долларын нөхөн төлбөр өгөхөөр санал болгосон ч Киев үүнийг нь бага байна гэж үзсэн юм. Украины Ерөнхийлөгч Владимир Зеленский “Энэ бол бага байна. Хэдийгээр хүний амийг мөнгөөр хэмжиж болохгүй ч бид үүнээс илүүг нэхэмжилж байна” гэж украины тэргүүн хэлжээ. Харин Украин улс өөрийн амь үрэгдсэн иргэдийнхээ ар гэрт 200 мянган гривен буюу 8.3 мянган ам.долларын нөхөн төлбөр олгосон байна.