Сирийн Засгийн газрын цэрэг Алеппо, Идлиб мужуудад явуулсан цэргийн ажиллагааныхаа үеэр нийт 600 хавтгай дөрвөлжин км газар нутгийг террористуудаас чөлөөллөө гэж тус улсын Зэвсэгт хүчний жанжин штаб ням гарагт мэдээллээ. Өнгөрсөн долоо хоногт Сирийн арми Идлиб мужийн гол хот, олон улсын М4 буюу Латакия-Алеппо, М5 буюу Дамаск-Алеппогийн авто зам дээр байрладаг Саракиб хотод бүрэн хяналт тогтоосон юм.
 “Зэвсэгт хүчин амжилт олсоор байна. Идлиб мужийн зүүнээс довтолж байгаа цэргүүд Алеппо мужийн өмнөдөөс дайрч байгаа цэргүүдтэй уулзаж нийтдээ 600 хавтгай дөрвөлжин км газар нутаг, хэдэн арван суурин газар, тосгон, толгодыг хяналтдаа авлаа” гэж Al-Ikhbariya телевизээр дамжуулсан мэдэгдэлд дурджээ.
Сирийн арми нэгдүгээр сарын 26-наас эхлэн террористуудын өдөр тутам хот руу гал нээж хэдэн арван энгийн номхон иргэдийн амийг хөнөөж байгаа Алеппо хотыг баруун талаас дайрч эхэлсэн юм. Хэдийгээр нэгдүгээр сард гал зогсооно гэсэн ч террористууд галаа үргэлжлүүлсээр байсан юм. Засгийн газрын хүчин террористуудын хамгаалалтын заагийг нэгдүгээр сарын 29-нд сэтэлж чадсан байна.
Ингэснээр 2012 оноос хойш террористуудын эзэмшилд байсан Маарет-Нууман хотыг нэгдүгээр сарын 29-нд чөлөөлсөн юм. Энэ хот Хама-Алеппогийн авто зам дээр байрладаг болохооор старатегийн чухал хот. Нөгөө талаар үүгээрээ Идлиб мужийн өмнөд хэсэгт байгаа террористуудын хангалтын гол тулгуур хүч болж байсан.