Казахстаны өмнөд нутгийн Жамбыл мужийн Кордайн районд болсон олныг хамарсан зодооны үеэр амь үрэгдсэн хүний тоо 10 хүрлээ гэж “Хабар 24” телевиз мэдээллээ. Үүний өмнө эмх замбараагүй байдлын үеэр амь үрэгдсэн хүнийг найм гэж мэдээлж байсан юм. Казахстаны Эрүүл мэндийн дэд сайд Ляззат Актаева “Найман хүн газар дээрээ нас барсан бол хоёр хүн эмнэлэгт ирээд мэс засалд орсон ч амийг нь аварч чадаагүй” гэж мэдэгджээ.
 Телевизийн мэдээлснээр энэ зодооны улмаас орон гэргүй болсон 1500 хүнийг одоо хүүхдийн цэцэрлэг, сүмд байрлуулан өдрийн гурван хоолоор хангаж, дулаан хувцас хөнжил олгожээ. Казахстаны эрх баригчид энэ зодоонд 1000 орчим хүн оролцсон, 49 хүн бэртэж гэмтэн эмнэлэгт хандсанаас 39 нь одоо эмнэлэгт хэвтэн эмчлүүлж байгаа гээд зодоон ердийн нэг ахуйн маргаанаас үүдэлтэй гэж тайлбарлаж байна.
 Харин тус улсын хүний эрхийг хамгаалах олон улсын хороо “Илүү нарийн шалтгаантай, ердийн нэг ахуйн маргаан байгаагүй” гээд хэргийг мөрдөн шалгахад нийгэм, шашны нэр нөлөө бүхий төлөөлөгчдийг оролцуулахыг Засгийн газрын комисст уриалсан байна. “Ажилгүйдэл, шийдвэрлээгүй нийгмийн асуудал, нийгмийн шударга ёс, засаг төрийн байгууллагад итгэх итгэл алдарсан, төрийн байгууллагууд асуудлыг шуурхай шийдвэрлэх чадваргүй байдал нь хүчирхийлэл, өдөөн хатгалга, хэт даврах үзэл үүсэх үндэс болж байна” гэж Хүний эрхийн хорооны мэдэгдэлд дурдсан байна. Казахстаны хүний эрхийг хамгаалагчид бас Киргизийн мэргэжил нэгтнүүдээсээ Казахстан-Киргизийн хил дээр хэдэн зуун эмэгтэй голдуу дүрвэгч сөргөлдөөнөөс зугтаан Киргизийн хил давахаар явж байгаа тухай мэдээлэл авсан байна.