ОХУ-ын Батлан хамгаалахын сайд Сергей Шойгу ирэх тавдугаар сарын 9-нд болох Аугаа их Эх орны дайнд ялсны 75 жилийн ойд зориулж Москвад болох цэргийн парад өмнөх жилүүдтэй харьцуулахад илүү өргөн дэлгэр болно гэж ярьжээ. Түүний хэлснээр энэ өдрийн парад цаг хагас үргэлжилж 15 мянган цэрэг дайчид, агаар газрын 400 нэгж техник оролцох гэнэ. Үүнээс гадна ялалтын баярын парадад гадаад орнуудын салаа салбарыг оролцуулах юм байна. “Парадад 15 мянган цэрэг дайчин, хуурай замын болон нисэх хүчний 375 нэгж техник оролцоно” гэж Сергей Шойгугийн хэлснийг РИА Новости агентлаг эш татжээ.
 Батлан хамгаалахын сайд баярын жагсаалд зенит пуужингийн болон агаараас эсэргүүцэн хамгаалах, цэргийн хамгаалалтын пуужингийн алсын зайны удирдлагатай минижүүлэх машинууд гээд шинэ төрлийн зэвсэг техник оролцоно гэж онцолсон байна.
 Сергей Шойгу бас “Ялалтын баярын парадад гадаадын армиудын 20 нэгж оролцоно. Энд Тусгаар улсуудын хамтын нийгэмлэгүүдийн орнуудаас гадна зарим орнууд оролцохоо мэдэгдээд байгаа” гэжээ. “Парадад их ялалтын үеийн дүрэмт хувцас бүхий 10 салаа, алдарт Т-34 танкийн батальон, өөрөө явагч СУ-100 их буу жагсана” гэж Батлан хамгаалахын сайд хэлсэн байна.
Өнгөрөгч 2019 онд Ялалтын баярын парадад 13 мянган цэрэг, орчин үеийн зэвсэглэлийн 130 гаруй техник оролцсон юм. Сайд бас Аугаа их ялалтын 75 жилийн ойд гадаад орнуудын төрийн тэргүүн, хүндтэй зочид өмнөх онуудаас илүү олон оролцоно гээд “Баярын парадын гол зочид нь Аугаа их Эх орны дайны ахмад дайчид байх болно. Тэдэнд зориулж дөрөв хоног үргэлжлэх баярын тусгай хөтөлбөр бэлтгэж байгаа” гэжээ.
 Үүний зэрэгцээ Аугаа их ялалтын ойд зориулсан баярын арга хэмжээ Оросын 500 орчим хот суурин газарт болж зэвсэгт хүчний дайчид оролцоно гэж энэ хоёрдугаар сарын 4-нд мэдээлсэн юм. “Тавдугаар сарын 9-нд ялалтын баяр Оросын 475 хот, суурин газарт болж цэргийн анги нэгтгэлийн дайчид оролцоно. Энд нийтдээ 116 мянган цэрэг дайчин оролцох юм” гэж Батлан хамгаалахын сайд тэмдэглэжээ.
Сергей Шойгу эцэст нь Дэлхийн хоёрдугаар дайн дууссаны 75 жил, аугаа их ялалтын ойн арга хэмжээ бүхэл бүтэн цогц арга хэмжээ болж бүтэн жилийн турш үргэлжилнэ гэсэн байна.