ОХУ-ын Ерөнхийлөгч Владимир Путин хоёр орныг нэгтгээд, нэг том гүрэн байгуулж Оросын төрийн тэргүүн түүнийг удирдах саналыг Беларусын Ерөнхийлөгч Александр Лукашенкод өнгөрөгч оны арванхоёрдугаар сарын сүүлчээр тавьсан гэж Bloomberg агентлаг үүний өмнө мэдээлсэн юм. Bloomberg-ийн эх сурвалж харин Александр Лукашенко зарим салбарын нэгдлийн талын хүн боловч, хоёр улсыг бүрэн нэгтгэхээс татгалзсан гэж бичсэн байна. В.Путин харин “том гүрэн” байгуулахаа А.Лукашенкод итгүүлэхийг оролдсон гэнэ.
Энэ мэдээллийг Оросын Ерөнхийлөгчийн хэвлэлийн нарийн бичгийн дарга Дмитрий Песков няцааж хоёр улсыг нэгтгэх тухай яриа байгаагүй гээд “Энэ бол тийм биш. Тэд Холбооны улсын хүрээнд холбооны нэгдлийг гүнзгийрүүлэх тухай л ярьсан” гэжээ. Орос, Беларусын нэгдлийн талаарх “30 арга зам”-ыг хэрэгжүүлсний дараа 31 дэх “арга зам” болох нэгдсэн валюттай болох, үнэт цаасны нэгдсэн төв зэрэг үндэсний хамтарсан байгууллагууд байгуулах саналыг Дмитрий Медведев бас ярьж байсан юм.

 Ийм үндэстэн хоорондын байгууллага байгуулах талаар Владимир Путин арванхоёрдугаар сарын 19-нд хийлгэсэн хэвлэлийн бага хурал дээрээ бас ярьж байсан юм.
Тэрээр Беларусын эдийн засагт Москва тусалж, татаас өгч, байгалийн хийгээ хямд өгч чадна, гэхдээ ийм татаас, татварын асуудлаар нэгдсэн дүрэм бодлого хэрэгтэй гэж байна. “Үүний тулд үндэстэн хоорондын хяналтын, үнэт цаасны байгууллага байгуулах хэрэгтэй” гэж Владимир Путин хэлсэн юм. Харин Александр Лукашенко Холбооны улсын үндэстэн хоорондын байгууллагууд байгуулах асуудлыг хэлэлцэхгүй гэж хариулсан байна. Түүнийхээр бол хоёр орны төрийн тэргүүнүүд Санкт-Петербургт арванхоёрдугаар сарын 20-нд тохиролцсон болохоор Москва, Минск хоёр энэ сэдвийг хөндөхгүй гэнэ.

эх сурвалж : "Ардчилал таймс" сонин