Сирийн Идлиб мужид байгаа Туркийн цэргийнхэнд аюул учруулахаар байх юм бол эндэхийн агаарын орон зайд нисч байгаа бүх онгоцыг устгана гэж Туркийн Ерөнхийлөгч Режеп Тайип Эрдоган сүрдүүлснийг Daily Sabah сонин нийтэлсэн байна. Тэрбээр энэ бүс нутагт байгаа манай цэргийнхэнд шууд заналхийлж аюул учруулахуйц онгоцыг ямар ч эргэлзээгүйгээр шууд устгана гээд “Идлиб дэх энгийн ард иргэдийг бөмбөгдөөд байгаа оногоцууд, цаашид ингэж чөлөөтэй нисэхээ болино” гэжээ.

 Р.Эрдоган бас Сирийн Ерөнхийлөгч Башар Асад, бусад хүчин бүдүүлгээр зөрчиж байгаа болохоор Идлибийн асуудлаар ОХУ-ын Ерөнхийлөгч Владимир Путинтай Оросын Сочид тохиролцсон яриа хэлэлцээр өнөөдөр үйлчлэхгүй гэсэн байна. Тэр бас Туркийн хүчний эсрэг шинэ дайралт хийвэл Анкара Сирийн цэргүүдэд хаана боломжтой байна тэр газраар илүү өргөн хүрээтэй цохилт өгнө гэжээ.
Өнгөрөгч нэгдүгээр сард Орос, Турк хоёр гал зогсоох талаар санаачилга гаргасан ч Идлиб мужид Сирийн цэргийнхэн, зэвсэгт дайдчын хооронд буудалцаан үргэлжилсээр байгаа юм. Сирийн Засгийн газрын цэрэг мужийн нутгийн гүнд нэвтрэн гол гол суурин газар, мужийн нийслэл, Туркийн цэргийн ажиглалтын дөрвөн цэг байдаг Саракиб хотыг эзлээд байна.
Орос, Турк хоёр улс Сирийн асуудлаар 2018 оны есдүгээр сард энхийн тохиролцоонд хүрсэн юм. Сирийн умард нутагт байлдааны ажиллагааг зогсоох, орос туркийн цэргийн хамтарсан эргүүл гаргаж, Идлиб, Алеппо мужид аюулгүй байдлын бүс байгуулах асуудлыг шийдсэн юм.

эх сурвалж : "Ардчилал таймс" сонин