Номхон далайд төөрч, задгай далайгаар 32 хоног явж хоёр мянга орчим км зам туулсан дөрвөн хүнийг аварлаа гэж Guardian сонин мэдээлжээ. Папуа-Шинэ Гвинейн зүүн хэсэгт байдаг Бугенвиль арлаас хэсэг жуулчин өнгөрөгч оны арванхоёрдугаар сарын 22-нд гарч эндээс 100 км зайтай Картеретийн аралд очиж Зул сарын баяр тэмдэглэхээр 12-уулаа моторт завиар гарчээ. Харамсалтай нь тэдний хөлөг хөрвөөж, хэд хэдэн хүн далайд живсэн бол үлдсэн хэсэг нь завиа арайхийн эргүүлж дээр нь гарсан ч бас нэг хэсэг нь амь алдсан гэнэ.
 Амьд гараад одоо Соломоны арлуудын эмнэлэгт сувилуулж байгаа Доминик Сталли “Болоод өнгөрсөн бүхнийг эргэн дурсахад үнэхээр аймшигтай байна” гээд “Бид Зул сарын баяр тэмдэглэхээр явж байсан болохоор үнэхээр жаргалтай байсан. Харамсалтай нь бүх зүйл ингэж төгслөө” гэжээ. Амьд үлдэгсэд хөлөг онгоц олж харж байсан ч авралын дохио өгч чадаагүй гэсэн байна. Эцэст нь тэднийг нэгдүгээр сарын 23-нд загас агнуурынхан олж аварсан байна.

 эх сурвалж : "Ардчилал таймс" сонин