Орос улс Крымыг өөртөө нэгтгэснээрээ “олон улсын эрхзүйг үл тоомсорлосон” бол одоо цэргийн хүч хэрэглэн европ тивийн хилийг, улс төрийн бодлогыг өөрчлөхийг оролдож байна гэж ХБНГУ-ын Ерөнхийлөгч Франк-Вальтер Штайнмайер Аюулгүй байдлын талаарх Мюнхений 56 дугаарх бага хурлыг нээж хэлэхдээ тэмдэглэснийг Reuters агентлаг дамжууллаа.
“Үүний үр дүнд энэ тивд урьдчилан таамаглаагүй тодорхойгүй байдал, үл итгэлцэл бий болж байна” гэж Штайнмайер тэмдэглэсэн байна.
ХБНГУ-ын ерөнхийлөгчийнхөөр бол олон улсын эрхийг зөрчиж байгаа бас нэг улс бол Хятад гэнэ. Гэхдээ Хятад “өөрийнх нь эрх ашиг, сонирхолд харшлаагүй тохиолдолд” ийм зөрчил гаргадаг гэжээ. Өмнөд-Хятадын тэнгис дэх БНХАУ-ын үйл ажиллагаа нь бүс нутгийг түгшээж байгаагийн зэрэгцээ Бээжингийн өөрийнхөө уйгур угсаатантай холбоотой бодлого нь “бүхнийг түгшээж байна” гэсэн байна.
Германы улстөрч бас АНУ-ын үйл ажиллагааг шүүмжилжээ. “Бидний ойрын холбоотон АНУ-ын өнөөгийн засаг захиргаа бас олон улсын хамтын нийгэмлэгийн үзэл санаанд харшилж байна” гэжээ. Тэрээр Дональд Трампын “Америкийн дахиад агуу гүрэн болгоно” гэсэн уриаг шүүмжилсэн байна.
“ХБНГУ-ын Ерөнхийлөгч Штайнмайер өнгөрөгч оны арваннэгдүгээр сард ЗХУ-ын Ерөнхийлөгч асан Михаил Горбачёвт захидал бичиж Оросыг Европтой ойртуулахад хамтран ажиллахыг хүссэн. Тэрээр энэ захидалдаа Орос-Германы болон Орос-Европын харилцаа өнөөдөр “Онцгой эмгэгтэй харагдаж байна” гэсэн юм.
Украины нэг хэсэг байсан Крым 2014 онд бүх нийтийн санал асуулгын дараа Оросын бүрэлдэхүүүнд ороход Украин, АНУ, Европын хэд хэдэн орон үүнийг хүлээн зөвшөөрөлгүй, Украины газар нутгийг булаан авсан гэж үзсэн. Крымыг өөртөө нэгтгэсний дараа ОХУ олон улсын хоригт орж энэ нь өнөө хүртэл үргэлжилж байгаа юм.
Харин Москва үүнийг хэдийнээ хаасан сэдэв гэж үзсээр байгаа юм.

эх сурвалж : "Ардчилал таймс" сонин