Ц.ХАС

 Украины далд эдийн засаг ойролцоогоор 846 тэрбум гривен буюу бараг 34 тэрбум ам.доллар болж байгаа нь тус улсын 2018 оны Дотоодын нийт бүтээгдэхүүний 23.8 хувийг эзэлж байна гэж төлбөрийн системийн Mastercard-ийн дэмжлэгтэй явуулсан судалгааныхаа дүнг Ernst & Young компани дэлгэлээ.
“Украины эдийн засагт далд эдийн засгийн эзлэх хувь 23.8 хувь болж байгаа бол 19.7 хувь нь болох 702 тэрбум гривен нь хувийн далд эдийн засаг, 4.1 хувь 144 тэрбум гривен нь өрхийн далд үйлдвэрлэл байна гэж “Электрон төлбөр ашиглах замаар далд эдийн засгийн түвшинг бууруулах нь” гэсэн судалгааны дүнгийн талаар Үндэсний банкны хэвлэлийн алба даваа гарагт мэдээлсэн байна. Энэ судалгааны дүнг тус компани Украины төрийн байгууллагуудын төлөөлөлтэй уулзах үеэрээ дэлгэжээ. Энд өгүүлснээр бэлэн бус төлбөрийн систем нэвтрүүлэх нь далд эдийн засгийн түвшинг бууруулах нэг үндэс болно гэнэ. “Төлбөрийн бэлэн бус системийг хоёр дахин нэмэгдүүлэхэд далд эдийн засгийн ДНБ-д эзлэх хэмжээ 0.6-3.7 хувиар буурч, улсын орлого 0.1-0.8 хувиар нэмэгддэг Европын туршлага байна” гэж мэдээлэлд дурджээ.
Судалгаанд өгүүлснээр өнөөдрийн Украинд бага дунд бизнесийн 62 хувь нь бэлэн мөнгөний гүйлгээгээр үйлчилж байгаа юм байна. Украины Эдийн засгийн яам далд эдийн засаг 2018 онд Дотоодын нийт бүтээгдэхүүний 30 хувийг эзэлж байна гэж гаргасан байдаг юм. Ernst & Young компани далд эдийн засгийн талаарх ийм судалгааг Чех, Польш, Словени, Словак, Хорват, Болгар, Серби, Босни Герцеговин зэрэг 33 улс оронд явуулахад улс орнуудын далд эдийн засгийн ДНБ-нд эзлэх хувь 10.1- 26.9 хувь хүртэл байдаг гэж Украины Үндэсний банкны хэвлэлийн алба мэдээлсэн байна.

эх сурвалж  : "Ардчилал таймс" сонин