Сансар, тойрог замыг хог хаягдлаас цэвэрлэх туршилтыг Японы агаар сансрын судалгааны агентлаг (JAXA) хийж эхлэхээр төлөвлөж байна гэж “Сансрын нисэгчдийн мэдээ” сайт хоёрдугаар сарын 15-нд мэдээлжээ. Тус агентлагийн хийсэн гэрээгээр бол эдний хог цэвэрлэх тусгай хиймэл дагуул тойрог замд тэнэж яваа хиймэл дагуулууд, пуужингийн хэсэг, хаягдал руу ойртон очоод эхний ээлжинд тэдний талаар мэдээлэл цуглуулах юм байна. Туршилтын хоёрдугаар шатанд тэдгээр хог хаягдлыг цуглуулан жижиглэж дэлхийн агаар мандлын өтгөн давхаргад оруулан шатаах гэнэ. Ашиглалтаас гарсан хиймэл дагуул, бусад хог хаягдал хэт ихэссэн тойрог замыг цэвэрлэх асуудлаар өнөө хүртэл нэгдсэн шийдэлд хүрч чадаагүй байгаа.

 Өнөөдөр янз бүрийн мэдээллээр сансар, тойрог замд хүний бүтээсэн 100 мянга гаруй биет байгаагийн нийт жин нь 5000 тонн хүрч байгаа гэдэг. Сансар, тойрог замд ажиллаж байгаа ажиллагаатай аппарат нь эдгээрийн дөнгөж зургаан хувийг эзэлдэг байна. Бусад нь том жижиг хэмжээтэй хог хаягдал аж. Ойрын үед сансрыг хог хаягдлаас цэвэрлэх арга хэмжээ авахгүй бол тойрог замд хоёр том биет мөргөлдөж осол гарах аюул нүүрлэнэ гэж Америкийн сансар судлалын NASA агентлагийн зөвлөх Дональд Кеслер хэлсэн. Энэ нь цаашлаад сансрын нислэг үйлдэхэд аюул учруулна.

эх сурвалж : "Ардчилал таймс" сонин