Гал зогсоох тухай хэлэлцээрийг Сирийн Ерөнхийлөгч Башар Асадын засаг захиргаа тэдний арми ойролцоогоор 20 мянган удаа зөрчсөн гэж Туркийн эрх баригч “Шударга ёс, хөгжлийн нам”-ын хэвлэлийн нарийн бичгийн дарга Омер Челик мэдэгдсэнийг Anadolu агентлаг дамжуулжээ. “Башар Асадын дэглэм Идлибт гал зогсоох тухай хэлэлцээрийг ойролцоогоор 20 мянган удаа зөрчсөн” гэж энд өгүүлсэн байна. Үүний зэрэгцээ Сирийн Ерөнхийлөгч Башар Асад хэдийгээр гадны дарамт шахалт байгаа ч гэсэн манай улс, Сирийн арми Алеппо, Идлиб мужийг чөлөөлөх ажиллагаагаа үргэлжлүүлнэ гэж мэдэгдээд байгаа юм. Орос болон Туркийн дэглэм гал зогсоох санаачилга гаргасан хэдий ч Сирийн арми өнгөрөгч нэгдүгээр сард Идлиб мужид зэвсэгт дайчдын эсрэг ажиллагаагаа эрс идэвхжүүлсэн. Энэ ажиллагааны хүрээнд тэнд байрлаж байсан террористуудын бүлэглэлийг цохиж Засгийн газрын хүчин энэ муж дахь аюулгүйн бүсийн бараг талыг эзлээд байна.

 Хоёрдугаар сард Туркийн цэргийн байрлалд хэд хэдэн удаа цохилт өгч цэргийн 12 албан хаагч, иргэний нэг мэргэжилтний амийг хөнөөсөн. Үүний хариу болгож Туркийн тал зуу гаруй удаа гал нээсэн бол зэвсэгт дайчид Сирийн хоёр ч нисдэг тэргийг Идлибийн тэнгэрт сөнөөсөн. Туркийн Ерөнхийлөгч Режеп Тайип Эрдоган туркийн цэргүүдийн эсрэг ийм ажиллагаа үргэлжлэх юм бол Анкара Сирийн хүчнийг өргөн хүрээтэй бөмбөгдөж, тус мужийн тэнгэрт яваа ямар ч онгоцыг шууд устгана гэж сүрдүүлсэн юм.

эх сурвалж : "Ардчилал таймс" сонин