АНУ-аас импортолдог 696 нэр төрлийн барааг ирэх гуравдугаар сарын 2-ноос импортын татвараас чөлөөлөхөөр шийдвэрлэснээ БНХАУ-ын Төрийн зөвлөлийн дэргэдэх Гаалийн тарифын хороо мэдэгдсэн байна. Мягмар гарагт нийтэлсэн энэ мэдээллээр уг зөвшөөрөл нэг жилийн хугацаанд хүчинтэй гэнэ.
“2020 оны гуравдугаар сарын 2-ноос БНХАУ-ын Төрийн зөвлөлийн дэргэдэх Гаалийн тарифын хороо Хятадын холбогдох аж ахуйн нэгжүүдийн хүсэлтийг авч эхэлнэ. Нягтлан шалгасны үндсэн дээр зах зээл, худалдааны зарчимтай нийцүүлэн АНУ-аас бараа бүтээгдэхүүн оруулж ирэх зөвшөөрөл олгоно. Энэ бүхэн АНУ-ын 1974 оны худалдааны хуулийг 301 дүгээр зүйлд нийцсэн байх ёстой” гэж баримт бичигт дурдсан байна. Энд гахайн мах, үхрийн мах, нефть зэрэг бүтээгдэхүүн оржээ.
АНУ, Хятадын худалдааны хэлэлцээ­рийн худалдааны дайныг тогтворжуулах эхний шатны тохиролцоо энэ сарын 14-нд хүчин төгөлдөр болж талууд бие биенийнхээ бараа бүтээгдэхүүнд ногдуулсан татвараа багасгахаар бол­сон. Гэхдээ хоёрдугаар шатны хэлэлцээр хийгээгүй байхад Хятадын бараа бүтээгдэхүүнд ногдуулах татвараа өөрчлөхгүй гэж АНУ-ын Ерөнхийлөгч Дональд Трамп мэдэгдээд байгаа юм.
Худалдааны дайныг тогтворжуулах хэлэлцээрийн эхний шатны баримт бичигт АНУ, Хятад хоёр өнгөрсөн нэгдүгээр сарын 15-нд Вашингтонд Ерөнхийлөгч Д.Трамп, БНХАУ-ын Төрийн зөвлөлийн орлогч дарга Лю Хэ нар гарын үсэг зурсан. Ингэснээр Хятад улс Америкийн 76.7 тэрбум ам.долларын бараа бүтээгдэхүүнийг эхний жилд худалдан авах бол дараа жил нь 123.3 тэрбум ам.долларын бараа бүтээгдэхүүн авахаар болж байгаа юм.

эх сурвалж : "Ардчилал таймс" сонин