ОХУ-ын ШУА-ийн Социологийн хүрээлэнгийн судлаачид Орост цоо шинэ төрлийн, сэтгэцэд нөлөөлөх бодист донтохгүйгээр байнга бага багаар хэрэглэдэг, өөрийгөө хянаж чаддаг мансуурагчид бий болж байна гэсэн дүгнэлтэд хүрсэн байна. “Орост мансууруулах бодисыг хэрэглэхдээ донтохгүйгээр хэрэглэж, тодорхой хугацаагаар өөрийгөө хянаж чаддаг тийм мансуурагчдын тоо өссөөр байна” гэж судалгааны дүнд өгүүлснийг “Известия” сонин дамжуулсан байна. Энэ нь яваандаа 10 жилийн дараа гэхэд энэ хүмүүс мансууруулах бодисонд хүнд хэлбэрийн хамааралтай болж, нийгмээс тусгаарлагдан ганцаардмал байдалд орцгоох болно. Өнөөдөр тэд мансууруулах бодисыг байнга хэрэглэхээ больж, гадаад төрхөөрөө эгэл жирийн хүмүүсээс ялгагдахгүй, хууль дүрмээ мэддэг, төлөв төвшин байдалтай явдаг болж байна.
Хар тамхи, мансууруулах бодисонд донтохгүйгээр өөрийгөө хянаж чаддаг ийм хэрэглээ нь ямар нэг сөрөг үр дагавраас зайлсхийх чадвартай гэж судлаачид үзэж байна. Харамсалтай нь, энэ нь даамжирсаар 10-15 жилийн дараа гэхэд мансууруулах бодисоос хараат болж, өөрийгөө хянаж чадахаа болих гэнэ. Гэхдээ одоогоор хар тамхи мансууруулах бодисыг ингэж хэрэглэж байгаа шинэ төрлийн мансуурагчдын тоог хэлэх аргагүй. Ганцхан ингэж мансуурагчдын тоо эрчимтэй өсч байгаа гэдгийг л хэлэх байна гэж Оросын ШУА-ийн Социологийн хүрээлэнгийн зан үйлийн салбарын удирдагч Маргарита Позднякова хэлжээ.

эх сурвалж : "Ардчилал таймс" сонин