Туркийн Ерөнхийлөгч Режеп Тайип Эрдоган сирийн Идлиб мужид цэргийн шинэ ажиллагаа явуулна гэж мэдэгдсэнийг туркийн NTV телевиз дамжуулсан байна. Түүнийхээр бол Идлиб дэх байлдааны ажиллагаагаа төгсгөх ажиллагаа эхлүүлнэ гээд, Дамаскт сүүлчийн сануулга өгч байгаа гэнэ. “Шууд хэлье. Идлиб дэх ажиллагаа нь цаг үеийн асуудал болоод байна” гэж тэр онцолжээ.
Хоёрдугаар сарын 8-10-нд Туркт болж, 17, 18-ны өдрүүдэд Орост үргэлжилсэн Идлибийн талаарх орос-туркийн хэлэлцээр “одоохондоо нааштай үр дүнд хүрээгүй байна” гэж Анкара үүний өмнө мэдэгдэж байсан. Идлиб дэх нөхцөл байдлыг тогтворжуулах хэлэлцээрийг тасалдуулж байна гэж Р.Эрдоган хоёрдугаар сарын 12-нд Москва, Дамаск хоёрыг буруутгасан. Сирийн засгийн газрын цэргүүд, оросын цэргийнхэнтэй хамтраад энгийн ард иргэд рүү дайрч байна гэж тэр буруутгаж байгаа юм. Харин Оросын Батлан хамгаалах яам үүнийг няцааж харин ч Турк өөрийн амлалтаа биелүүлэхгүй байна гэдэг.
Сирийн Идлиб мужийн Тафтаназад байрладаг туркийн ажиглалтын цэгийг их буугаар буудах үеэр Туркийн гурван цэрэг амь үрэгдсэний дараа эндэх нөхцөл байдал муудсан. Туркийн тал үүний дараа сирийн засгийн газрын цэргийн байрлал руу их буугаар 115 удаа буудсан байна. Туркийн Ерөнхийлөгч Р.Эрдоган ч Туркийн иргэдийн амь үрэгдсэний төлөө Сирийн тал “өндөр үнэ төлнө” гэж мэдэгдсэн. Харин Сирийн тал Анкараг улс орны нь тусгаар байдалд халдаж байна гэж буруутгаад туркийн дайралтад хариу өгсөөр байх болно гэжээ.

эх сурвалж :"Ардчилал таймс" сонин