Украины ерөнхийлөгч Владимир Зеленский Брюссельд хийсэн айлчлалынхаа хүрээнд Европын холбоо, Умард Атлантын гэрээний өндөр албаны хүмүүстэй Крымыг эгүүлэн авах төлөвлөгөөний тухай ярилцлаа гэж украины төрийн тэргүүний хэвлэлийн нарийн бичгийн дарга Юлия Мендель мэдээлснийг “1+1” телевиз дамжууллаа.
Энэ хойгийн талаарх Киевийн байр суурь хэзээ ч өөрчлөгдөөгүй “Крым бол Украин” гэсэн хэвээр байгаа гэдгийг Мендель онцлон тэмдэглээд ганцхан энэ талаар ямар нэг шийдвэрийн талаар ярих эрт байна, тодорхой төлөвлөөгүй байгаа гэжээ.

Украин улс Крымыг эгүүлэн авна гэдэгт итгэлтэй байгаагаа Украины ерөнхийлөгч Владимир Зеленский үүний өмнө нэг бус удаа илэрхийлсэн хэмээн ИА REGNUM мэдээлж байна.
Орост Засгийн газар солигдсон цагт Крымын хойг Украины бүрэлдэхүүнд эргэж орно гэж төрийн тэргүүн мэдэгджээ. Энэ нь чухам хэзээ болохыг Зеленский тодруулж хэлээгүй байна. Тэр өнгөрсөн тавдугаар сард болсон “Крымын татаруудыг хоморголон хядсан аймшигт өртөгсдийн дурсгалыг хүндэтгэх өдөр”-өөр үг хэлэхдээ ингэж онцолсон байна.
Украинд 2014 оны хоёрдугаар сард төрийн эргэлт болсны дараа эдний бүрэлдэхүүнд байсан Крымд бүх нийтийн санал асуулга болж үр дүнд нь Оросын бүрэлдэхүүнд орсон юм. Санал асуулгад оролцогсод Крым болон Севастополийг Оросын бүрэлдхүүнд оруулахаар санал илэрхийлсэн юм. Харин Киев энэ шийдвэрийг өнөө болтол хүлээн зөвшөөрөлгүй, оросын түрэмгийлэгчдийн эзэлсэн нутаг гэсээр алдагдсан нутгаа эгүүлэн авах найдвараа гээхгүй байна. ОХУ-ын Ерөнхийлөгч Владимир Путин харин Крымын асуудал бүрэн эцэслэгдсэн гэж нэг бус удаа мэдэгдээд байгаа юм.