Америкийн Теннеси мужид болсон хар салхины улмаас хамгийн багаар бодоход 25 хүн амь үрэгдлээ гэж орон нутгийн засаг захиргаа мэдээлснийг NBC телевиз дамжуулсан байна. Гуравдугаар сарын 3-нд нутгийн төв хэсгийг, улмаар нийслэл Нэшвиллийг дайрснаас нийслэлд болон Дэвидсон, Уилсон, Бентон, Патнам тойргуудад хүний амь эрсэджээ. Гамшгийн үеэр 19 хүн амь алдлаа гэж үүний өмнө мэдээлж байсан. Мужийн амбан захирагч Билл Ли гамшгийн үеийн онц байдал зарласан байна. Амь үрэгдсэн хүмүүсээс гадна олон хүн бэртэж гэмтэн, сураггүй алга болжээ.
Хар салхины улмаас цахилгаан дамжуулах шугамд гэмтэл гарч 50 мянган айл өрх гэрэл цахилгаангүй үлдсэн бол салхинд 45 барилга байшин нурж сүйрэн, өөр хэдэн арван барилга эвдэрч гэмтсэн байна. Энэ удаагийн хар салхи АНУ-д тохиож байсан хар салхинаас хамгийн хүчтэй, хөнөөлтэй нь гэнэ. Үүний өмнө 2019 оны гуравдугаар сарын 3-нд бас Алабама мужид болсон хар салхины үеэр 23 хүн амь үрэгдэж байсан. Теннеси мужид болсон хар салхины улмаас амь үрэгдсэн хүмүүсийн ар гэрийнхэнд АНУ-ын Ерөнхийлөгч Дональд Трамп гүн эмгэнэл илэрхийлжээ.
Өнгөрсөн нэгдүгээр сард Америкийн хэд хэдэн мужид хүчтэй салхи шуурга, хар салхи болж хоёр хоногийн дотор 11 хүн амь алдаж байсан удаатай.

эх сурвалж :"Ардчилал таймс сонин"