Америкийн Нью-Йорк хотын тойргийн шүүх хар тамхины “Синалоа” бүлэглэлийн толгойлогч Атигар хочтой Хоакин Гусманы шоронд хорих нөхцөлийг зөөллөхгүй гэсэн шийдвэр даваа гарагт гаргасныг CNN телевиз дамжуулсан байна.
Шүүгч Брайан Коган энэ тухайгаа “Гэм буруутай этгээдийн хоригдох нөхцөл нь хуучнаараа өөрөөр хэлбэл чанга хатуу хэвээр байх ёстойг би зөвшөөрч байна” гэснийг телевиз эш татсан байна. “Биеэ зөв авч байгаа гэдэг нь хорих нөхцөлийг өөрчлөх үндэслэл биш” гэж тэр онцолжээ.

Үүний өмнө Гусманы өмгөөлөгч үйлчлүүлэгчийг нь “стандартын бус, чанга” дэглэмээр хорьж байна гэж гомдол гаргасан юм байна. Атигарыг эрүүл агаарт гаргах, ариун цэврийн цаас өгөх зэргээр хангахгүй байна гэжээ.
Хар тамхины наймааны хаан Атигар 2015 онд Мексикийн шоронгоос 10 метрийн гүн дэх 1.5 км хонгилоор зугтаан оргож байсныг 2016 оны нэгдүгээр сард Синалоа мужийн Лос-Мочис хотоос баривчилсан юм. Үүнээс үүдээд шоронгийн нөхцөлийг нь чангалсан юм байна.

Нью-Йорк мужийн Дорнод тойргийн тангарагтны шүүх өнгөрсөн хоёрдугаар сард Атигар хочтой Гусманыг хар тамхи мансууруулах бодис үйлдвэрлэх, түгээх зорилгоор олон улсын яриа хэлэлцээр байгуулсан, хар тамхины орлогын төлөө галт зэвсэг хэрэглэсэн, гэмт хэргийн бүлэглэл байгуулж оролцсон хэрэгт буруутган бүх насаар нь хорих ялаар шийтгэсэн юм.