Грекийн цагдаа, цэргийнхэн Эврос районы “Кастаниес” шалган нэвтрүүлэх боомтын орчмоор Турк-Грекийн хил давахыг оролдсон цагаачдын эсрэг нулимс асгаруулагч хий хэрэглэлээ гэж Reuters агентлаг гуравдугаар сарын 4-нд мэдээллээ. Туркийн талаас орж ирсэн хэдэн зуун хүн хаалттай байсан хилийг давах гэж дайрсан нь ийм мөргөлдөөнд хүргэжээ. Хууль бусаар хил нэвтрэхийг оролдсон бүлэг хүн Грекийн хууль сахиулагчид руу мод чулуу, нулимс асгаруулагчтай гар бөмбөг шидээд хил давахаар дайрсны улмаас Грекийн хүчнийхэн нулимс асгаруулагч хэрэглэсэн гэж Naftemporiki хэвлэлд бичсэн байна. Европын комисс үүний өмнө Грекийн хил бол нийт Европын хил, ийм учраас хариуцлагатай байх ёстой гэж мэдэгдээд хууль бус цагаачид Европ руу нэвтрэх гээд байгаа энэ асуудлыг хамтын ажиллагааны хүрээнд, хамтын хүчээр даван туулна, ялангуяа санхүүгийн хувьд дэмжинэ гэсэн.
Сирийн Идлиб мужид Сири, Туркийн хооронд мөргөлдөөн үүсч нөхцөл байдал хурцадсаны улмаас цагаач дүрвэгсэдийн урсгалыг цаашид барьж чадахгүй цаашид Европ руу нэвтрэх хилээ нээж, сая сая цагаач барууныг зорино гэж Туркийн Ерөнхийлөгч Режеп Тайип Эрдоган гуравдугаар сарын 2-нд мэдэгдсэн. Туркийн Дотоод хэргийн яамны мэдээлснээр Р.Эрдоганы энэ мэдэгдлийн дараа хууль бус 47 мянган цагаач Туркээс Европын холбооны улсуудын хилийг давж оржээ.

эх сурвалж :"Ардчилал таймс сонин"