Туркийн Ерөнхийлөгч Режеп Тайип Эрдоган ОХУ-д айлчилж ОХУ-ын Ерөнхийлөгч Владимир Путинтэй өнгөрсөн баасан гарагт хэлэлцээ хийсэн нь зургаан цаг илүү хугацаагаар үргэлжилжээ. Төрийн тэргүүнүүдийн хэлэлцээрийн гол сэдэв нь Сирийн Идлиб мужид үүсээд байгаа нөхцөл байдал байлаа. Хэлэлцээрийн дүнд хоёр улсын тэргүүн Сирид нөхцөл байдлыг тогтворжуулах баримт бичгийн талаар тохиролцож чадсан байна.
Баримт бичигт дурдсанаар:
1. Мөргөлдөөн болж байгаа бүсэд байлдааны бүхий л ажиллагааг гуравдугаар сарын 6-ны шөнө дундаас эхлэн зогсоох,
2. Сирийн М4 авто замаас өмнө болон хойд зүгт зургаан км-ийн өөргөнтэй аюулгүйн бүсийг Орос, Турк хоёр улс байгуулах,
3. М4 авто замын дагуу Орос, Турк хоёр улс энэ сарын 15-наас эхлэн эргүүл хийх гэсэн байна.
Оросын тэргүүн Владимир Путин энэ тохиролцоо Идлиб мужийн нөхцөл байдлыг тогтворжуулах гол үндэс болно гэдэгт найдаж байгаагаа илэрхийлжээ.
Сирид болж байгаа үйл явдлын талаарх Анкарагийн үнэлэмжийг Москва тэр бүрт хүлээн зөвшөөрдөггүй ч шаардлагатай чухал мөчид бид ямар ч үг хэлээ ололцдог гэж хэлэлцээрийн дараа Владимир Путин онцлон тэмдэглэжээ. Хоёр улсын тэргүүн Сирийн асуудлаарх Астанагийн форматын хүрээнд хамтын ажиллагаагаа үргэлжлүүлж, терроризмтэй хийх тэмцлээ сулруулахгүй хэмээн тохиролцжээ.

эх сурвалж :"Ардчилал таймс сонин"