Шинэ төрлийн коронавирус COVID-19-ийн тархалт нь дэлхий даяар цар тахлын хэмжээнд хүрлээ гэж Дэлхийн эрүүл мэндийн байгууллагын Ерөнхий захирал Тедрос Аданом Гебрейесус Швейцарийн Женев хотноо хийлгэсэн хэвлэлийн мэдээн дээрээ мэдэгдлээ. “Коронавирус COVID-19-ийн тархалт цар тахлын хэмжээнд хүрлээ гэсэн дүгнэлтэд хийлээ” гэж тэр хэлсэн байна. Мэргэжилтнүүд үүний өмнө шинэ төрлийн коронавирусийн халдвар нь дэгдэлтийн хүрээнд байна, гэхдээ олон газар голомт гарч байна гэж үзэж байсан. ДЭМБ-ын тэргүүний хэлснээр өнөөдөр энэ өвчин 121 оронд тархаж нийт 125 мянга шахам хүн халдвар аваад байгаа юм байна.
Тедрос Аданом Гебрейесус “цар тахал” гэдэг үгийг “боломжгүй” гэж ойлгохгүй байхыг анхааруулсан байна. Энэ нэр томьёог буруу ашиглах юм бол хүмүүст айдас төрүүлж “өвчний тархалттай тэмцэх ажилд ялагдаж, үхлээс өөр сонголтгүй болсон” сэтгэгдэл төрүүлнэ гэдгийг тэр сануулжээ. Өвчний дэгдэлтийн цар тахлын хэмжээнд хүрлээ гэдэг нь “Вирусийн аюулын талаарх ДЭМБ-ын зүгээс хийх үнэлгээг өөрчлөхгүй” гэсэн байна. Ингэхээр энэ үнэлгээ нь ДЭМБ-ын зүгээс энэ халдварын тархалтыг зогсоох талаар хийж байгаа ажил, үүний эсрэг тэмцэж байгаа улс орнуудын өмнөө тодорхойлсон бодлого зорилтыг өөрчлөхгүй гэжээ.

Коронавирусийн тархалтыг зогсоохын тулд улс орнууд шийдвэртэй ажиллагааг яаралтай авч хэрэгжүүлэхийн чухлыг Т.Гебрейесус сануулж байна. Өнөөдөр дэлхийн 81 улс орон энэ өвчний халдвар өөрийнх нь нутагт орж ирээгүйг мэдэгдэж байна гэж тэр тэмдэглэжээ. Үүнээс гадна 57 улсад энэ өвчний тохиолдол 10 хүрээгүй байгааг онцлоод энэ улс орнууд халдварыг цааш нь тархаахгүй байх талаар идэвхтэй ажиллахыг зөвлөлөө. Үүний зэрэгцээ “Эрүүл мэндээ хамгаалахын зэрэгцээ эдийн засгийн хэмнэлт, нийгмийн давхарга, хүний эрхийг хүндэтгэх”-д анхаарахыг сануулж байна.
ДЭМБ-ын тэргүүн энд хэлсэн үгэндээ өвчний халдварыг эрт илрүүлж байгаа болон, халдварын тархалтыг хязгаарлахын тулд идэвхтэй ажиллан тархалтыг сааруулж байгаа улс орнуудад талархал илэрхийлжээ. Өнөөдрийн байдлаар Иран, Итали, Өмнөд Солонгост хамгийн олон тохиолдол илэрч байгааг тэр бас тэмдэглэв. DXY.cn сайтад мэдээлснээр гуравдугаар сарын 11-ний байдлаар дэлхий даяар 124.968 хүн коронавирусийн халдвар аваад байгаагийн 4585 нь нас бараад байна. Харин 70 мянга орчим хүн энэ вирусийн халдвар авсан ч эдгэрсэн байна.
Нийт халдвар авсан 120 мянган хүний 10 хувь нь зөвхөн Итали улсад байна. Италийн Иргэний хамгааллын газрын тэргүүн Анжело Боррелли зөвхөн гуравдугаар сарын 10-нд гэхэд л вирусийн халдвар авсан итали хүний тоо хоёр мянгаар нэмэгдлээ гэж мэдэгдсэн. Гэтэл энэ улсад халдвар авсан ч эдгэрч гарсан хүн ердөө 41, эмнэлгээс гарсан нь 1045 байгаа юм. Ганц шөнийн дотор энэ улсад коронавирусийн улмаас 196 хүн нас барж нийт нас барсан хүний тоо 827 болжээ. Нас барсан болон эрүүлжиж гарсан хүнтэйгээ нийлээд Италид нийтдээ 12462 хүн шинэ төрлийн коронавирусийн халдвараар өвчлөөд байгаа юм. Энэ бүх нөхцөл байдлаас болоод Италийн Ерөнхий сайд Жузеппе Конте нэн тэргүүний хэрэгцээт бүтээгдэхүүн худалдаалдаг дэлгүүр, эмийн сангуудаас бусад бүхий л төрлийн худалдааны газруудыг хаах шийдвэр гаргажээ.
Орост коронавирусийн халдвар авсан хүний тоо нэг шөнийн дотор наймаар нэмэгдэж нийт 28 болсон байна. Үүнээс үүдээд ОХУ Европын Итали, Испани, Герман улсуудтай агаарын харилцаагаа зогсоогоод байна.

эх сурвалж :"Ардчилал таймс сонин"