Донбасст хүч сааруулан, Золотое, Счастье суурингуудад хил нэвтрэх шинэ цэгүүд нээх зэрэг асуудлаар гурван талт холбоо барих ажлын хэсэг Беларусын нийслэл Минскт тохиролцлоо хэмээн Украины ерөнхийлөгчийн захиргааны хэвлэлийн алба мэдээллээ. Донецкийн бүгд найрамдах улс гэгчийн Гадаад хэргийн сайд Наталья Никоноровагийн хэлснээр талууд гал зогсоох дэглэмийг зөрчих явдлыг арилгах арга механизмын талаар урьдчилан тохиролцжээ. Харин Луганскийн бүгд найрамдах улс гэгчийн Гадаад хэргийн сайд Владислав Дейнего ажлын хэсгийн гуравдугаар сарын 25-нд хийхээр төлөвлөж байгаа дараагийн уулзалт хуралдаанаар мөргөл­дөөний бүс дэх хүчийг сулруулах санал боловсруулж хэлэлцэх гэжээ.
Хуралдаанаар бас Донбасс дахь нөхцөл байдлыг тогтворжуулах асуудлаар зөвлөлдөх зөвлөл байгуулах тухай хэлэлцсэн байна. Энэ зөвлөл нь улс төрийн асуудлаар зөвлөмж боловсруулж үүнийгээ Европын аюулгүй байдал, хамтын ажиллагааны байгууллага, Герман, Францын төлөөлөгчидтэй зөвшилцсөний үндсэн дээр эцсийн шийдвэр болгон гаргаж байх гэнэ хэмээн РИА Новости агентлаг мэдээлжээ.
Талууд бас ойрын хугацаанд солилцох олзлогдогсодын нэрсийг гаргахаар тохиролцсон байна. Энэ нэрсээ долоо хоногийн дотор гурван талын ажлын хэсэгт танилцуулан хоёр долоо хоногийн хугацаанд эцэслэн шийдвэрлээд гуравдугаар сарын 25 гэхэд хоёр тал олзлогдсон хүмүүсийг солилцоно гэж тохиролцжээ. Энэ уулзалтын протоколыг Европын аюулгүй байдал, хамтын ажиллагааны байгууллагын нарийн бичгийн дарга нарын газарт хүргүүлэх юм байна.
Гурван талын хэлэлцээрт ОХУ-ын Ерөнхийлөгчийн тамгын газрын даргын орлогч Дмитрий Козак, Украины Ерөнхийлөгчийн тамгын газрын тэргүүн Андрей Ермак нар оролцсон байна. Украины зүүн өмнөд нутгийн Донецк, Луганск мужууд 2014 оны дөрөвдүгээр сард өөрсдийгөө Бүгд найрамдах улс хэмээн тунхагласны дараа Украин энд цэргийн ажиллагаа явуулж эхэлсэн. НҮБ-ын тооцоолсноор зургаан жил үргэлжилж байгаа энэ зэвсэгт мөргөлдөөний үеэр 13 мянга орчим хүний амь үрэгдээд байгаа юм.

эх сурвалж :"Ардчилал таймс сонин"