Умард Солонгост 2017 онд Пунгери полигонд туршсан цөмийн бөмбөгний хүчин чадлыг шинжээчид газар хөдлөлийн чичирхийллийн үзүүлэлтийг судалсны үндсэн дээр тодорхойлсон байна. Шинжээчид ингээд үүний өмнө мэдээлж байсан хүчин чадал нь бодит байдлыг хэт багасгасан байжээ гэж дүгнэжээ.
Defense One хэвлэлд бичсэнээр бол цөмийн туршилтын хүч нь гадаадын мэргэжилтнүүдийн үнэлж байснаас 66 хувь давж байна гэсэн байна.

“Дэлбэрэлтийн хүчийг эхлээд 30-300 килотоннын тротиллийн эквиваленттай тэнцэхээр байна гэж тооцож байлаа. Чичирхийллийн мэдээллүүдээс үзэхэд дэлбэрэлтийн хүч 148-328 килотоннын хооронд буюу АНУ-ын Хиросимад хаясан цөмийн бөмбөгнөөс 16 дахин давж байна” гэж мэдээлэлд дурджээ. Шинжээчдийн үзэж байгаагаар бол ийм бөмбөгийг АНУ-ын нийслэлд хаявал Вашингтоны төв хэсгийг бүрэн устгаад, дэлбэрэлтийн төвөөс гурван миллийн радиуст байгаа бүх хүн гуравдугаар зэргийн түлэгдэл авна гэсэн байна.