Дэлхийн нэг, хоёрдугаар дайны үеэр улсад нь учруулсан хохирлынхоо төлөө Герман улс 320 тэрбум евро Грекэд төлөх тухай хэлэлцээр эхлэхийг уриалсан нот бичгийг Германд суугаа Грекийн Элчин сайд Гадаад хэргийн яаманд нь хүлээлгэн өглөө гэж Грекийн Гадаад хэргийн яам албан ёсны сайтдаа мэдээлжээ.
Энэ бол германы булаан эзлэлтийн үед ард түмэнд учирсан сэтгэл санааны хохирлоос гадна соёл түүх, археологийн үнэт зүйлсийг дээрэмдэн зөөж авч явсны төлбөр гэж мэдээлэлд өгүүлсэн байна. Энэ нөхөн төлбөрийг Германаас нэхэмжлэх асуудлыг Грекийн парламент дөрөвдүгээр сарын 17-ны хурлаараа шийдвэрлэсэн юм байна. Ингэхдээ Дэлхийн хоёрдугаар дайны үеэр Герман улс Грект учруулсан хохирлыг 309,5 тэрбум евро гэж тооцсон бол Дэлхийн нэгдүгээр дайны үеийн хохирлыг 9,2 тэрбум евро гэжээ.

Германы канцлер 2019 оны нэгдүгээр сард Грекийн ерөнхийлөгч Прокопис Павлопулостой уулзахдаа Гуравдугаар рейхийн тус улсад үйлдсэн гэмт хэргийн төлөө хариуцлага хүлээхээ мэдэгдсэн ч нөхөн төлбөрийн тухай дурсаагүй юм.
Дэлхийн хоёрдугаар дайны үед нацистууд Грекийг эзлэн гол гол бүс нутгийг нь удирдан Итали, Болгарт фашизмыг түгээх дамжлага нутаг болгож байсан юм. 1941-1944 оны үед грекийн олон арван мянган хүн өлсгөлөн, хэлмэгдүүллээр нас барж, улс орны нь эдийн засаг сүйрсэн юм. Дэлхийн хоёрдугаар дайны жилүүдэд Грекийн нийт хүн амын 20 хувь нь амь үрэгдсэн гэдэг юм.