Францын эрх баригчид мягмар гарагаас эхлэн иргэдээсээ ахуйн хэрэглээний төлбөр авахгүй байх шийдвэр гаргасан байна. Үүний талаар Ерөнхийлөгч Эммануэль Макрон Иргэдээ мөнгөгүй болгохгүйн тулд маргаашнаас эхлэн ус, хий, цахилгааны төлбөр, байрны түрээс авахгүй байхаар шийдсэнээ мэдэгдэж, дампуурах магадлалтай компаниудад 300 тэрбум еврогийн санхүүгийн дэмжлэг үзүүлэхээ зарласан байна. Мөн тэрээр “Бид урьд хожид байгаагүй зүйл та бүхнээс гуйж байгаагаа ойлгож байна. Гэвч нөхцөл байдал ингэхээс өөр аргагүй байна. Бид дайны талбар дээр байна” хэмээн хэлжээ.

Франц улс дотоодын хөдөлгөөнөө 15 хоногийн хугацаатай бүрэн хязгаарлах болсон бөгөөд нэн шаардлагагүй бол гэрээс гарахгүй байж, олон нийтийг хамарсан үйл ажиллагаа зохион байгуулахыг хоригложээ. Хэрвээ энэ журмыг зөрчвөл хариуцлага хүлээх аж.   

Францад явуулах хоёр дахь шатны орон нутгийн сонгуулийн санал хураалтыг хойшлуулж, тус улсад явуулж буй тэтгэврийн шинэчлэлийг түр зогсоогоод байна. 

Францад хоногийн дотор халдвар авсан хүний тоо 1210-аар нэмэгдэж 6633-д хүрч,халдварын улмаас 148 хүн хорвоог орхисон байна. 

Эх сурвалж: ВВС