Шинэ төрлийн коронавирусийн халдвар эхлээд Хятадад маш хурдтай тархсан шалтгааныг Америкийн эрдэмтэд тодорхойлсон байна. Тэдний үзэж байгаагаар өвчин нь нууц үедээ байгаа хөнгөн өвчтөнүүд олон байсан нь энэ халдварт вирусийг тархаах нэг үндсэн шалтгаан болсон гэж Science сэтгүүлд нийтэлсэн судалгааны дүнд өгүүлжээ. Хятадад энэ өвчин анх гарснаас хойших мэдээллийг, хүмүүсийн хөдөлгөөнтэй уялдуулан математик загварчлалаар тооцож үзэхэд 2020 оны нэгдүгээр сарын 23-наас л Ухань хотод хөл хорио тогтоосон байтал үүнээс өмнө тус хотод орж ирсэн хүмүүсийн 86 хувь нь өвчний нууц үедээ байсан хүмүүс байсан нь энэ хотод өвчин түгэх шалтгаан болсон байна гэж энд бичжээ.
Энэ шинэ дүгнэлт нь корона­вирусийн халдвар тархалтын хур­дацыг тодорхойлоход чухал ач холбогдолтой гэж судлаачид үзэж байна. Судлаачдынхаар бол өвчний тархалтын ихэнх нь ийм нууц шинж тэмдэгтэй хүмүүсээс халдварласан гэнэ. Тэднийхээр өвчний халдвар авсан нь тогтоогдсон хүмүүсийг бодвол анхны шинж тэмдэг бүхий хүмүүсийн халдвар тараах явдал 55 хувь, өвчний ямар ч шинж тэмдэг илрээгүй эрүүл юм шиг хүмүүсээс халдвар тарах нь 79 хувь илүү байсан гэж эрдэмтэд онцлон тэмдэглэжээ.
Үүнээс үзэхэд Хятадын эрх баригчид Ухань хотод нэгдүгээр сарын 23-наас хөл хорио тогтоож, олон нийтэд мэдээлэл хүргэх ажлыг сайжруулснаар коронавирусийн тархалтыг хязгаарлахад чухал ач холбогдолтой арга хэмжээ болсон гэж судлаачид дүгнэжээ.

эх сурвалж :"Ардчилал таймс сонин"