Энэ оны эхний хоёр сард Хятадын эдийн засаг урьд хожид байгаагүй хамгийн таагүй үзүүлэлттэй гарлаа гэж тус улсын Статистикийн байгууллагын эх сурвалжаас авснаа Reuters агентлаг дамжууллаа. БНХАУ-ын Засгийн газрын мэдээлснээр өнгөрсөн нэг, хоёрдугаар сард Хятадын аж үйлдвэрийн бүтээгдэхүүний өсөлт өнгөрсөн оны мөн үетэй харьцуулахад 13.5 хувь буурсан байна. Шинэ төрлийн коронавирусийн халдварын тархалтаас үүдсэн ийм бууралт нь сүүлийн 30 жилд тохиож байгаагүй дээд хэмжээ болж байна. Коронавирусийн халдвар Хятадын Ухань хотоос эхлэн гарсан өнгөрөгч оны арванхоёрдугаар сард БНХАУ-ын аж үйлдвэрлэлийн өсөлт 6.9 хувьтай байсан. Энэ уналт цаашид ч үргэлжилнэ гэж шинжээчид сануулж байгаа. Үүнтэй зэрэгцээд Хятадын экспортын хэмжээ ч 17.2 хувиар буурчээ. Улс орны эдийн засаг эргэн сэргэхэд коронавирусийн халдвар тархах нь зогссоноос хойш дахиад хэдэн сарыг туулах хэрэгтэй болно гэж эдийн засгийн шинжээчид анхааруулж байна.
Хэдийгээр шинэ төрлийн коронавирус Хятадаас эхлэн тархаж, хамгийн олон хүн өвчилж, хамгийн олон хүн нас барсан ч гэсэн сүүлийн үед энэ өвчний тархалт, нас баралт БНХАУ-д буурч байгаа. Сүүлийн долоо хоногт Хятадад энэ өвчний халдвараар 100 орчим хүн л өвдсөн байна.

эх сурвалж :"Ардчилал таймс сонин"