Хятадын эрдэмтд  Ухань, Шэнжэнь хотуудын 2,000 гаруй өвчтөний мэдээллийг боловсруулан, тухайн хотуудын эрүүл хүмүүсийн өгөгдөлтэй харьцуулсан судалгаа хийжээ. Судалгаагаар А (II) бүлгийн цустай хүмүүст Covid-19 вирусийн халдвар илүү хүнд тусаж байгаа бол O (I) бүлгийн цустай хүмүүсийг хөнгөн хэлбэрээр өвчлүүлж байгаа нь харагдсан байна. Хэдийгээр энэ судалгаа нь бүрэн батлагдаагүй, эхний шатных ч цаашид гүнзгийрүүлэн судалж байгаа ч халдвар авсан өвчтөнүүдийг эмчлэхдээ цусны бүлгээр нь ялгаж анхаарал тавих хэрэгтэйг оролцсон эрдэмтэд нь эрх баригчид болон эрүүлийг хамгаалах байгууллагуудад зөвлөсөн байна.

Судалгаагаар A (II) бүлгийн цустай хүмүүст коронавирус илүү өндөр хувьтай халдварлаж, шинж тэмдгүүд нь илүү хүндээр илэрч байсан байна. Тиймээс уг бүлгийн цустай өвчтөнүүдэд илүү их анхаарал тавьж, эрчимтэй эмчлэх хэрэгтэй. Мөн А бүлгийн цустай хүмүүсийг халдвараас хамгаалахад илүү анхаарал тавибал коронавирусийн тархалтыг бууруулах боломжтой гэж үзэж байгаагаа Уханий Их сургуулийн Жоннань эмнэлгийн тэргүүлэх судлаач Ван Шинхуань хэлсэн байна.

Харин хамгийн эрсдэл багатай бүлгээр O бүлгийн цустай хүмүүс байна гэнэ. Судалгаанд Бээжин, Ухань, Шанхай, Шэнжэнь хотуудын эрдэмтэд, эмч нар оролцож, тайланг нь өнгөрсөн долоо хоногт шинжлэх ухааны Medrxiv.org сайтад нийтэлж, бусад судлаачдын санал дүгнэлтийг авч эхэлжээ.

Эх сурвалж: South China Morning Post