Хорватын Леград хотод байшин, хэсэг газрыг нэг кунугээр зарж байгаа нь Оросын 11 рубль буюу манай 400 орчим төгрөгтэй дүйж байна. Энэ талаар Hrvatska radiotelevizija хэвлэл мэдээлжээ. Худалдан авагч нь 40-ээс доош настай байх ёстой бөгөөд, гэрээ хийснээс хойш тус хотод 15 жилээс багагүй хугацаагаар амьдрах ёстой гэнэ. Үүний зэрэгцээ байшин худалдан авсан хүнд хотын зүгээс үл хөдлөх хөрөнгө худалдан авахад нь зориулан 35 мянган хорват кун олгохоос гадна, байшингаа засварлахад нь зориулан 25 мянган кун олгох юм байна.
Леград хотын дарга Иван Саболичийн хэлснээр бол хотод ажиллах хүч ховор, ажилгүйдэл тун бага болохооор илүү их ажиллах хүч татахын тулд ийм шийдэл гаргасан гэнэ. Одоогоор тус хотод очиж, байшин худалдан авч амьдрахаар Хорватын бүхий л өнцгөөс гадна Словени, Босни Герцеговиноос ч санал ирж байгаа гэнэ. Драва голын баруун эрэгт байрлах Леград нийгэмлэг нь 2000 гаруй хүнтэй нэг мянга орчим нь Леград хотдоо амьдардаг юм байна. Хотын эрх баригчид ийм байдлаар хотдоо, бүс нутагтаа залуу гэр бүлийг татаж хүн амаа өсгөх, ажиллах хүчээ нэмэгдүүлэхээр зорьж байна гэж Hrvatska radiotelevizija хэвлэлд бичжээ.

эх сурвалж :"Ардчилал таймс сонин"