“Сирийн Идлиб мужид туркийн цэргийн албан хаагчид амь үрэгдсэний төлөө Орос хариуцлага хүлээх ёстой” гэж АНУ-ын Төрийн нарийн бичгийн дарга Майк Помпео гуравдугаар сарын 17-нд мэдэгджээ. Тэр бас Идлиб мужид цэргийн ажиллагаа явуулж байгаа Туркийг дэмжиж байгааг илэрхийлсэн байна. “Оросууд өөрийн цэргийн ажиллагааныхаа үеэр Туркийн цэргийн албан хаагчдыг хөнөөсөн гэдэгт бид итгэлтэй байна. Манай холбоотон НАТО-гийн гишүүн Туркийг бид дэмжиж Сирийн Идлиб мужид болж байгаа хүчирхийллийг төгсгөл болгохын төлөөх тэдний тэмцэлд тусламж дэмжлэг үзүүлэх талаар нэмэлт арга хэмжээ авах асуудлыг авч үзнэ” гэж М.Помпеогийн хэлснийг Төрийн департаментын албан ёсны сайтад эш татан мэдээлжээ.

Сирийн зэвсэгт хүчин хоёрдугаар сарын сүүлчээр Идлиб мужид байгаа террористуудад агаараас цохилт өгөх үеэр Туркийн цэргийн 35 албан хаагч амь үрэгдсэн. Үүний дараа Анкара Сирид цэргийн ажиллагаа эхлүүлж, үүндээ АНУ болон НАТО-гийн дэмжлэг хүссэн.

Туркийн Ерөнхийлөгч Режеп Тайип Эрдоган гуравдугаар сарын 5-нд Москвад ирж Оросын тэргүүн Владимир Путинтэй уулзаж Сирийн Идлиб мужийн нөхцөл байдлын талаар ярилцан гал зогсоох асуудлаар тохиролцож, гуравдугаар сарын 15-наас эхлэн Орос, Турк улсын цэргийнхэн хамтраад М-4 авто замын дагуу эргүүл хийж байгаа аж.