“Өнөөдөр Орос оронд гарсан хоёр гэмт хэргийн нэг нь илрэхгүй үлдэж байна” гэж ОХУ-ын Ерөнхийлөгч Владимир Путин Ерөнхий прокурорын газрын ажилтнуудын өргөтгөсөн хуралдаан дээр тэмдэглэснийг Кремлийн албан ёсны сайтад дүрс бичлэгээр нийтэлжээ. “Үндсэндээ гарсан гэмт хэргийн тал нь илрэхгүй үлдэж байна. Энэ талаар та нөхөд, хууль сахиулах бусад байгууллагын ажилтнууд нэгийг бодох хэрэгтэй байна” гэж В.Путин хэлсэн байна. Ерөнхийлөгчийн хэлснээр Орост гэмт хэрэг 2016 оноос өссөн гэнэ. Тэрбээр мэдээллийн технологийн салбарын үйл ажиллагааны болон хүүхдийн эсрэг эрүүгийн хэрэгт онцгой анхаарч илрүүлэхийн чухлыг онцлон тэмдэглэжээ. Ерөнхийлөгч бас иргэдийн нийгмийн эрхийг хамгаалахын төлөө үр дүнтэй ажиллахыг прокурорын салбарын ажилтнуудад анхааруулсан байна. Мөн прокурорын байгууллагын нэг үндсэн үүрэг бол авлигын гэмт хэрэгтэй тэмцэж эх орны хулгайлагдсан мөнгийг эргүүлэн олж авч, үндэсний томоохон төслүүдийг бодитой болоход туслах явдал гэжээ. “Ерөнхий прокурорыг энэ хүрээн дэх ажлаа улам идэвхжүүлж, Дотоод явдлын яам, Оросын Шүүхийн байгууллага, Оросын татварын алба, Санхүүгийн хяналтын албатай улсаас, манай иргэдээс, нийтийн хөрөнгөнөөс хулгайлсан хөрөнгийг эргүүлэн авчрах талаар нягт хамтран ажиллах хэрэгтэй” гэж Владимир Путин хэлжээ.