Афганистаны Засгийн газар “Талибан” хөдөлгөөнийхөнтэй олзлогдогсодоо солилцох асуудлаар анх удаа хэлэлцээр хийсэн байна. Коронавирусийн дэгдэлтээс болоод хэлэлцээрийг онлайнаар зохион байгууллаа хэмээн зуучлагч Катарын Гадаад хэргийн яам мэдээлжээ. “Хэлэлцээр бүтээлч, үр дүнтэй болж, хоёр тал олзлогдогсодын нэрсийн жагсаалт, хорьж байгаа газар, тэднийг хэрхэн солилцох талаар маш чухал асуудлуудыг хөндөж ярилаа” хэмээн Катарын Гадаад хэргийн яамны мэдээлэлд дурдсан байна. Талууд улс орондоо хүчирхийллийг бууруулахад аль аль нь хүлээсэн үүргээ биелүүлнэ, ийм хэлэлэцээрийг ойрын хэдэн өдөр үргэлжлүүлнэ хэмээн баталсан байна. Үүний зэрэгцээ АНУ, Катар хоёр коронавирусийн халдвар тархаад байгаа ийм нөхцөлд олзлогдогсодыг солилцох үйл явцыг аль болох түргэвчлэх хэрэгтэй хэмээн шаардлаа.
АНУ болон “Талибан” хөдөлгөөний төлөөлөгчид хоёрдугаар сарын 23-нд Катарын нийслэл Дохад энхийн хэлэлцээрт гарын үсэг зурсан бол “Талибан” хөдөлгөөн Афганы Засгийн газартай бас хэлэлцээр хийн улс орондоо гуравдугаар сарын 10-наас эхлэн гал зогсоохоор тохиролцсон. Мөн тохиролцсоны дагуу харилцан итгэлцэл бэхжүүлэхийн тулд хоёр тал олзны хүмүүсээ солилцох болсон. Коронавирусийн халдвар тархаад байгаа энэ үед “Талибан” хөдөлгөөний олзлогдогсодыг нэн яаралтай суллахыг АНУ-ын Афганыг хариуцсан тусгай төлөөлөгч Залмай Халилзад энэ сарын 18-нд Афганистаны Засгийн газарт уриалсан. Харин Афганистаны Засгийн газар “Талибан” хөдөлгөөний отрядуудын эсрэг байлдааны ажиллагаагаа сэргээхийг үндэсний арми, аюулгүй байдлын хүчиндээ даалгасан.