“Шинэ төрлийн коронавирусийн халдвараар 350 гаруй мянган хүн өвчилж энэ өвчин дэлхийн бараг бүх оронд тархаад байна” гэж Дэлхийн эрүүл мэндийн байгууллагын ерөнхий захирал Тедрос Адханом Гебрейесус Twitter хуудсандаа бичжээ.
Дэлхийн эрүүл мэндийн байгууллагын мэдээгээр энэ өвчин анх гарснаас хойш 67 хоноход 100 мянган хүн өвчилсөн бол дараагийн 100 мянган хүн нь 11 хоногт өвчилж, сүүлийн гурав дахь 100 мянган хүн нь ердөө дөрөв хоногийн дотор бүртгэгдсэн байна.
Хөл хорио, хязгаарлалтын арга хэмжээг чанд сахих нь өвчний халдварын тархалтыг удаашруулна гэж Гебрейесус онцлон тэмдэглэжээ. Гэхдээ харамсалтай нь хамгаалах хэрэгсэл, материалын үйлдвэрлэл удааширч, дутагдаж байгаа нь сөрөг нөлөө үзүүлж байна гэж ДЭМБ-ын тэргүүн бичжээ. Үүний зэрэгцээ коронавирусийн халдвараас сэргийлэхийн тулд туршигдаагүй эм хэрэглэхгүй байхыг бас анхааруулсан байна.
“Туршиж шалгаагүй эм хэрэгсэл ашиглах нь ард иргэдэд худал итгэл төрүүлж, үүнээс болж хортой нөлөө үзүүлж мэднэ. Ингэснээр бусад өвчинд хэрэгтэй эм бэлдмэл хомсдолд орж ч болзошгүй” гэж Гебрейесус мэдэгджээ.
COVID-19-ийн халдварын тархалттай тэмцэхэд дараагийн авах нэг алхам нь “Их-20”-ийн орнуудын удирдлагад хандаж хүн нэг бүрийн хамгаалах хэрэгслийн үйлдвэрлэлийг өсгөх, тэднийг экспортлохыг нь хориглохгүй байх явдал гэж ДЭМБ үзэж байна.

эх сурвалж :"Ардчилал таймс сонин"