Олон улсын олимпын хороо коронавирусийн халдварын тархалтын нөхцөл байдлыг судалж үзээд Японы нийслэл Токиод ирэх долдугаар сарын 24-нөөс наймдугаар сарын 9-ний хооронд болох ёстой байсан зуны олимпын тоглолтыг гарцаагүй өөрчлөх нь зөв юм байна гэсэн гаргалгаанд хүрсэн гэж ОУОХ-ны гишүүн Ричард Паунд хэлж байна.
 Тэрээр Usatoday.com хэвлэлд өгсөн ярилцлагадаа “Зуны олимп долдугаар сарын 24-нд эхлэхгүй” гэж мэдэгджээ. Үүний өмнө Канад, Австрали улсууд олимпын тоглолтыг өөрчлөхгүй юм бол өөрийн тамирчдаа Япон руу илгээхгүй гэдгээ мэдэгдсэн. Мөн олон улс орны үндэсний олимпын хороод зуны олимпыг энэ жил зохион байгуулахгүй байхыг уриалаад байгаа юм.
 Үүнтэй зэрэгцээд японы “Санкей” сонин зуны олимпын тоглолтыг Япон дээд тал нь нэг жилээр хойшлуулахад бэлэн байна хэмээн Засгийн газрын эх сурвалж хэллээ хэмээн мэдээлсэн байна.
Сонины эх сурвалжийн хэлснээр бол 2022 онд Бээжинд өвлийн олимп болох учраас энэ хоёр наадмыг давхардуулахгүйн үүднээс зуны олимпыг коронавирусээс болоод дээд тал нь нэг л жилээр хойшлуулна гэж хэлсэн гэнэ.
 Японы Ерөнхий сайд Шинзо Абэ энэ 24-ний өдөр Олон улсын олимпын хорооны ерөнхийлөгч Томас Бахтай утсаар ярьж, зуны олимпын талаар ярилцах юм байна.

эх сурвалж :"Ардчилал таймс сонин"