ОХУ-ын Ерөнхийлөгч Владимир Путины даалгавраар оросын Батлан хамгаалахын сайд Сергей Шойгу Сирид нисэн очиж Ерөнхийлөгч Башар Асадтай хэлэлцээр хийлээ гэж батлан хамгаалахын хэвлэлийн алба мэдээлснийг РИА Новости агентлаг дамжуулсан байна. Талууд Идлиб мужид гал зогсоох, сирийн бусад нутагт тогтвортой байдал бий болгох асуудлаар санал солилцжээ. Үүний зэрэгцээ С.Шойгу, Б.Асад хоёр олон улсын террорист бүлэглэлтэй тэмцэх хамтын ажиллагааны хүрээнд цэрэг-техникийн хамтын ажиллагаа, Сирийн ард иргэдэд үзүүлэх Оросын хүмүүнлэгийн тусламж, үйл ажиллагааны талаар ярилцсан байна.
 Оросын Батлан хамгаалахын сайдын суусан онгоцны аюулгүй байдлыг Сирийн агаарын орон зайд Оросын агаар-сансрын хүчний Су-35С онгоцууд хангаж дагалдан нисчээ. ОХУ-ын Ерөнхийлөгч Владимир Путин, Туркийн Ерөнхийлөгч Режеп Тайип Эрдоган нар гуравдугаар сарын эхээр Идлиб мужид гал зогсоох аюулгүйн бүс байгуулах талаар харилцан тохиролцсон. Үүний дараа Сирийн Ерөнхийлөгч Башар Асад хэрвээ Америк, Туркийн цэргийнхэн эх орноос нь гарчих юм бол Дамаск өөрөө асуудлаа зохицуулж чадна гэж мэдэгдсэн. Сирийн Идлиб мужид Сирийн Засгийн газрын хүчин сөрөг хүчин, террористуудын байрлал руу нэгдүгээр сараас эрч хүчтэй давшсанаар тэндэхийн нөхцөл байдал хурцадсан учраас Орос-Турк хоёр ийн хэлэлцээр хийхэд хүрсэн юм.

эх сурвалж :"Ардчилал таймс сонин"