Газрын тосны үнэ огцом унаж байгаа нь АНУ-ын Техасын нефть боловсруулагчид, занар үйлдвэрлэгчдэд том цохилт болж байгаагаас тэд Газрын тос экспортлогч орнуудын байгууллагатай хэлэлцээ хийж эхэлжээ. Техасын засаг захиргааны газрын тос байгалийн хийн зохицуулалтын комиссын гишүүн Райан Ситтон нефтийн зах зээлд үүсээд байгаа тулгамдсан асуудлаар Газрын тос экспортлогч орнуудын байгууллага ОПЕК-той хэлэлцээ хийж эхэлсэн, цаашид Саудын Араб, Оростой хэлээлцээр эхэлж магадгүй гэснийг Politico хэвлэл дамжуулжээ. Р.Ситтоны хэлснээр тэрээр ОПЕК-ийн ерөнхий нарийн бичгийн дарга Мохаммед Баркиндотой утсаар ярьж нефтийн үнийн энэ уналт нь дэлхийн эдийн засагт нөлөөлж байгаа талаар ярилцсан гэнэ. Үүсээд байгаа нөхцөл байдлыг тогтворжуулахад Газрын тос экспортлогч орнуудын байгууллага ирэх зургадугаар сард болох дээд хэмжээний уулзалт хүртлээ ямар ч нөлөө үзүүлж чадахгүй гэж М.Баркиндо хэлснийг Р.Ситтон дамжуулжээ. Энэ уулзалтад Техасын нефтийнхэн оролцох ёстой юм. “Тэгэхээр би Саудын Арабын нефтийн сайд, Оросын нефтийн сайдтай холбоо барьж болох юм” гэж Р.Ситтон хэлсэн байна.
Техасын нутаг дэвсгэрт АНУ-ын нефть олборлолтын гол төв болох Пермийн сав газар байдаг. Газрын тос экспортлогч орнуудын байгууллага ОПЕК, Оросын нефть олборлолтыг хязгаарлах тухай хэлэлцээр гуравдугаар сарын 6-нд тохиролцоонд хүрч чадалгүй тасалдсанаас хойш булангийн орнууд нефть олборлолтоо нэмэгдүүлэн улмаар нефтийн үнэ огцом унаад байгаа аж.

эх сурвалж :"Ардчилал таймс сонин"