Шинэ төрлийн коронавирусийн дэлхий дахинд учруулж байгаа нийгэм эдийн засгийн үр дагаврыг арилгахад чиглэсэн төсвийн бодлого, эдийн засгийн арга хэмжээ, нийгэм, эдийн засаг, санхүүд нөлөөлж байгаа зүйлсийн эсрэг баталгаа болгон дэлхийн эдийн засагт таван их наяд ам.доллар оруулна гэж онлайн хэлбэрээр зохион байгуулсан дээд хэмжээний уулзалтын дүнгийн тухай мэдээлэлд дурдсан байна. Мэдэгдэлд бас коронавирусийн халдварын учруулсан үр дагавартай тэмцэхэд эдийн засгийн хүрээнд “Их-20”-ийн орнууд зохицуулах үүрэг гүйцэтгэнэ гэжээ. Коронавирусийн халдвараас болоод учирч байгаа, цаашид учирч болзошгүй эдийн засаг, нийгмийн хохирлыг аль болох багасгах, зах зээлийг тогтворжуулж, дэлхийн эдийн засгийн өсөлтийг сэргээхийн тулд “Их-20”-ийн орнууд бололцоотой бүхий л бодлого, хэрэгсэл, аргыг ашиглана гэж мэдээлэлд дурджээ.
Эдийн засгийг дэмжих арга хэмжээг “Их-20”-ийн орнууд одоо “цаг алдалгүй, шийдвэртэй “ авч хэрэгжүүлнэ гэсэн байна. Үүний зэрэгцээ “Их-20”-ийн орнуудын тэргүүн нар өөр өөрийн улсын Төв банк, Сангийн яамыг коронавирусийн халдварын үр дагаврыг даван туулах байнгын төлөвлөгөө чиглэл боловсруулахыг хүссэн байна.
Ийнхүү пүрэв гарагт онлайн хэлбэрээр болсон “Их-20”-ийн орнуудын тэргүүнүүд онлайн уулзалтаараа шинэ төрлийн коронавирусийн халдварын улмаас нийгмийн амьдралын төрөл бүрийн салбарт учирч байгаа бэрхшээлийг даван туулахад хүчээ нэгтгэн хамтран ажиллахаар тохиролцов. “Бүх дэлхийг хамарч байгаа энэ аюулын өмнө бид нэгдсэн нэг фронт байгуулан тэмцэхээр эрс шийдэмгий эрмэлзэж байна” гэж хамтарсан мэдэгдэлдээ өгүүлжээ. Энд бас “Энэ тахлын хүн амын эрүүл мэнд, нийгмийн амьдрал, эдийн засгийн салбарт учруулж байгаа сөрөг үр дагаврыг бууруулахын төлөө хамтран тэмцэх нь бидний туйлын чухал зорилт” гэж тэмдэглэсэн байна.

эх сурвалж :"Ардчилал таймс сонин"