Дэлхийн эдийн засаг хямралд орлоо хэмээн Олон улсын валютын сангийн тэргүүн Кристалина Георгиева мэдэгдлээ. Түүнийхээр бол энэ хямралын үндсэн шалтгаан нь шинэ төрлийн коронавирус COVID-19-ийн дэгдэлт гээд энэ хямрал 2009 оны хямралаас ч хүнд байна гэнэ. “Одоо бид хямралд орлоо гэдэг нь хэн бүхэнд тодорхой байна. Энэ хямралыг 2021 он гэхэд даван туулж, эдийн засгаа сэргээж чадна гэж таамаглаж байна, гэхдээ бид энэ коронавирусийн халдварын тархалтыг зогсоож, энэ хүндрэлийг даван туулсан тохиолдолд шүү дээ” гэж ОУВС-гийн тэргүүн Кристалина Георгиева сэтгүүлчдэд ярьсан байна.
Хатагтай К.Георгиевагийн ярьснаар дэлхийн эдийн засгийн энэ хямрал, зогсонги байдлын хамгийн гол аюул нь олон аж ахуйн нэгжийн дампуурал, ажилчдыг бөөнөөр нь халах эрсдэл дагуулах явдал гэнэ. Түүний хэлснээр энэ нь маш хортой үр дагавар дагуулж нийгмийн бүтцийг ч сүйдэлж мэднэ гэжээ. Олон улсын валютын сангийн тэргүүн “Их-20”-ийн гишүүн орнууд дэлхийн эдийн засгийг сэргээхэд зориулж таван их наяд ам.доллар гаргах болсныг бас мэдээлсэн байна. Олон улсын валютын сангийн хувьд өөрийн үйл ажиллагаа явуулдаг 186 оронд эдийн засаг, хүн амыг нь дэмжих, шалгах ажил хийж байгаа гээд үүнийгээ “хэн хаана юу хийж байгааг мэдэж авах, улмаар туслах” зорилготой гэжээ.
 Шинэ төрлийн коронавирусийн энэ тархалт нь дэлхий даяар хэдэн зуун мянган аж ахуйн нэгж, үйлдвэр заводын үйл ажиллагаа, агаарын тээврийн хэдэн мянган нислэгийг зогсоож байна. Ийм нөхцөлд олон орны засгийн газар эдийн засаг, хүн амаа дэмжих арга хэмжээ авч эхлээд байна. АНУ-ын Сенат гэхэд л улс орныхоо эдийн засагт дэмжлэг үзүүлэхээр 2.2 их наяд ам.долларын багц гаргахаар болж байна.

эх сурвалж :"Ардчилал таймс сонин"