Ирак дахь алан хядагч “Исламын улс” зэвсэгт бүлэглэлтэй тэмцэж байсан АНУ тэргүүтэй эвслийн цэргүүд Киркук хотод байсан К-1 нисэх баазаа орхиж иракийн цэргийнхэнд шилжүүлэн өгсөн байна. “Гуравдугаар сарын 29-нд олон улсын цэргийн эвслийн нисэх бааз К-1-ийг нэгдсэн шуурхай ажиллагааны “Тасралтгүй шийдэл” бүлэглэлээс Иракийн аюулгүй байдлын хүчинд шилжүүлэн өгөх ёслол боллоо” гэж эвслийн мэдэгдэлд дурджээ. Эвслийнхэн цэргийн баазыг ийн шилжүүлэн өгөх нь саяхан Ирак дахь баазууд руу довтолсон болон коронавирусийн халдварын тархалттай огт холбоогүй бүр эртнээс төлөвлөсөн байсан ажил гэдгээ онцолжээ. Цэргийн баазыг орхисноор нэг сая ам.долларын үнэ өртөг бүхий өмч хөрөнгийг Иракийн Засгийн газарт шилжүүлэн өгч байгаа юм гэж мэдэгдэлд дурдсан байна.
Үүний өмнө өнгөрсөн долоо хоногийн пүрэв гарагт АНУ тэргүүтэй олон улсын цэргийн эвсэл Иракийн умард нутгийн Найнава мужид байсан Кайара нисэх баазаа бас иракийн цэргийнхэнд шилжүүлэн өгсөн. Гуравдугаар сард бас АНУ-ын цэргийнхний ашиглаж байсан Сирийн хил дээрх Аль-Каим баазыг иракийн зэвсэгт хүчинд шилжүүлэн өгсөн билээ.
Цаашид Иракийн Засгийн газартай хамтран ажиллах хүрээнд энэ онд эндэх цэргийн хэд хэдэн баазын цэрэг техникийг өөр хооронд нь нэгтгэх болно гэдгээ эвслийн төлөөлөгчид мэдэгдээд байгаа. Ер нь Ирак дахь эвслийн хүчний байрлаж байгаа цэг цөөрсөөр байгаа. Харин Иракийн Засгийн хүсэлтээр эвслийн зарим хүчин орон нутгийн аюулгүй байдлыг сахиулах, аюулгүйн албаныхныг сургах зориулалтаар нэг хэсэг нь үлдэх юм.

эх сурвалж :"Ардчилал таймс сонин"