Орос, Хятад улсууд шинэ коронавирусийн халдварыг дэлхий дахинд, АНУ-д тархаасны хариуцлагыг хүлээх ёстой гэж Цагаан ордны Үндэсний аюулгүй байдлын зөвлөх байсан Фиона Хилл мэдэгдсэн байна. Түүнийхээр Москва, Бээжин хоёр энэ талаар нягт хамтран ажиллаагүй, мэдээлэл түгээхээс зориуд зайлсхийсэн гэснийг Daily Beast хэвлэл мэдээлснийг ИноТВ дамжуулжээ. Цагаан ордны экс зөвлөх Орос, Хятад улсууд коронавирусийн халдварын тархалтыг ашиглаж байгааг онцлоод “Ерөнхийлөгч “Хятадын вирус” гэж хэлээд ч нэмэр болохгүй. Хятад, Орос хоёр үүнийг хийгээд, одоо хариуцлагаас зайлсхийх гэсэн нэг арга” гэсэн байна.
Хатагтай Фиона Хилл бас Хятад коронавирусийн халдварын эхний шатанд нууцалж байгаад газар авхуулсныхаа төлөө хариуцлага хүлээхээс зайлсхийхийн тулд одоо нийгмийг энэ өвчний халдварын тухай мэдээллээс холдуулахыг эрмэлзэж байна гэжээ. “Тэд нутагт нь эхэлж гарсан вирус дэлхий дахиныг хамарсан цар тахал болсны хариуцлагыг өөртөө хүлээхийг хүсэхгүй байна” гэж тэр мэдэгдсэн байна. Харин Оросын тухайд хатагтай Ф.Хилл “Орос бол хүмүүсийн анхаарлыг өөрсдийн дутагдлаас холдуулж, тэднийг гадны дайсныхаа эсрэг чиглүүлэхийг оролдож байна” гэж буруутгажээ. Оросууд коронавирус ингэж тархсан бурууг Вашингтонд тохохыг эрмэлзэж байна гэж улстөрч мэдэгдэв. Шинэ төрлийн коронавирусээс болж Америкийн эдийн засагт учирсан хохирлыг Хятадын Засгийн газар хариуцах ёстой гэж үүний өмнө АНУ-ын эрх баригчид ярьж байсан удаатай.

эх сурвалж :"Ардчилал таймс сонин"