Шинэ төрлийн коронавирусийн халдварын тархалтыг бүрэн зогсоож чадлаа гэж БНХАУ-ын Улсын эрүүлийг хамгаалах хорооны төлөөлөгч Ми Фэн мэдэгдсэнийг хятадын Xinhua хэвлэл дамжуулжээ.
Түүнийхээр бол энэ сарын 28 гэхэд тус улсад коронавирусийн халдварын улмаас нас барсан хүний тоо 3300 болсон гэнэ. Гэхдээ энэ халдвар зөөвөрлөгдөн орж ирэх магадлал өндөр байгаа учраас вирусийн халдвартай тэмцэх ажил цаашид үргэлжилнэ гэсэн байна. Өнгөрөгч долоо хоногийн бмяба гараг гэхэд л тус улсад гадаадын 42 орноос ирэгсэдийн дотроос 693 хүнд коронавирус илэрсэн гэж Ми Фэн хэлжээ.
South China Morning Post хэвлэлийн мэдээлснээр гуравдугаар сарын 29-ний байдлаар коронавиурсийн халдвартай хүний тоогоор Хятад дэлхийн улс орнуудаас гуравт орж байна. Хятадад коронавирусээр халдварласан хүн 81439 байгаа юм. Гэтэл АНУ-д 122666, Италид 92472 хүн коронавирусийн халдвар аваад байгаа юм.
Үүний өмнө коронавирусийн халдвар анх гарсан Ухань хот хоёр сарын турш ажиллахгүй байсан нийтийн тээвэр, метроны ажиллагаагаа сэргээсэн мэдээлэл гарч байсан. Үүний дараа Ухань хотын Хубэй мужид байрладаг нисэх буудлууд ажлаа сэргээж, агаарын харилцааг сэргээсэн байна. Гуравдугаар сарын 28 гэхэд л Хубэй мужид коронавирусийн шинэ тохиолдол илрээгүй харин Ухань хотод таван хүн энэ халдварын улмаас нас барсан юм. Тус мужид коронавирусийн халдвар авсан хүн нийт 67801 байгаагийн 50 мянга гаруй нь Ухань хотод байгаа юм.
Эхлээд шинэ төрлийн энэ вирусийн голомт нь Хятад байсан бол гуравдугаар сарын дундуур халдварын голомт нь Европ боллоо гэж Дэлхийн эрүүл мэндийн байгууллага зарласан. Дараа нь өнгөрсөн долоо хоногийн эхээр ДЭМБ-ын төлөөлөгч Маргарет Харрис коронавирусийн халдварын шинэ голомт нь АНУ боллоо гэж мэдэгдээд байна.

эх сурвалж :"Ардчилал таймс сонин"