Саудын Араб тавдугаар сар гэхэд газрын тосны экспортоо нэмэгдүүлж хоногт 10.6 сая баррельд хүргэнэ хэмээн тус улсын Эрчим хүчний яам гуравдугаар сарын 30-ны даваа гарагт зарласан байна. Ингэж экспортоо нэмэгдүүлснээр дотоодын зах зээл дэх нийлүүлэлтээ өдөр тутам 600 мянган баррелиэр бууруулж чөлөөлөх боломж бий болно гэнэ. Мөн экспортыг нэмэгдүүлснээр байгалийн хийн Аль-Фадили дэх үйлдвэрийн бүтээгдэхүүний дотоодын хэрэглээг өсгөх боломж бүрдэнэ гэснийг мэдээллийн ТАСС агентлаг дамжуулсан байна.
Саудын Араб дөрөвдүгээр сарын 1-нээс газрын тос олборлолтоо өсгөнө гэсэн шийдвэр хүчин төгөлдөр байгаа хэмээн даваа гарагт бас мэдээлсэн. Энэ өдөр Brent маркийн нефтийн үнэ 23 ам.доллароос бууж 22.97 ам.доллар болсон нь 2002 оны арваннэгдүгээр сараас хойш анхны тохиолдол байв. WTI маркийн нефтийн тавдугаар сарын гэрээний үнэ бүр 8.52 хувиар унаж 19.98 ам.доллар болсон нь мөн 2002 оноос хойших анхны тохиолдол болж байна.
Нефть олборлох хэмжээгээ багасгах тухай Газрын тос экспортлогч орнуудын хэлэлцээр тасалдсан дараа Саудын Араб хоногт олборлох нефтийнхээ хэмжээг 12 сая баррельд хүргэн нэмснээр гуравдугаар сарын 6 гэхэд зах зээл дээрх нөөц эрс нэмэгдсэн. Үүнээс болж нефтийн үнэ дэлхийн зах зээл дээр унаж эхэлсэн билээ.

эх сурвалж :"Ардчилал таймс сонин"