Боливарын бүгд найрамдах улсын хямралыг зохицуулах талаар АНУ-ын дэвшүүлсэн төлөвлөгөөг Венесуэль няцааж байгаагаа тус улсын Гадаад хэргийн сайд Хорхе Арреса Twitter хуудсаараа дамжуулан мэдэгджээ. Х.Арресса “Боливарын бүгд найрамдах улсын Засгийн газар хаанаас ч, хэнээс ч, гадаадын нэг ч улсаас халамж дэмжлэг авахгүй” гэж бичсэн байна. Түүнийхээр АНУ-ын Ерөнхийлөгч Дональд Трампын засаг захиргаанаас сүүлийн үед Венесуэлийн эсрэг авч хэрэгжүүлж байгаа арга хэмжээнүүд нь үнэхээр өрөвдмөөр, үүнээс гадна өмнөхөөс ялгагдахгүй байна гэнэ. Тэр бас коронавирусийн халдварын тархалтыг далимдуулан АНУ-ын геополитикийн өмч эзэмших гэсэн оролдлого нь “ямар ч өрөвдөх сэтгэлгүй өчүүхэн хүнээс л гарах” зүйл гэжээ.
Х.Арреаса АНУ-ыг нэг талын хоригоо цуцалж Венесуэлийн Засгийн газрыг солих гэсэн бүтэлгүй оролдлогоосоо татгалзан, түрэмгийллээ зогсоож өөрийнхөө дотоодод тулгамдсан асуудалдаа анхаарахыг уриалсан байна. Үүний өмнө Венесуэлийн улс төрийн хямралыг шийдвэрлэх шинэ төлөвлөгөө боловсруулж Ерөнхийлөгч Николас Мадуро, сөрөг хүчний удирдагч Хуан Гуайдо нарыг төлөөлсөн Үндэсний Ассамблейн гишүүдээр түр засгийн газар байгуулах санал дэвшүүлсэн. Ингэсэн тохиолдолд Вашингтон тус улсын эсрэг тавьсан хоригоо цуцална гэсэн байна.
Ерөнхийлөгчөөр дахин сонгогдсон Николас Мадуро тангараг өргөсний дараа 2019 оны нэгдүгээр сарын 21-нд Венесуэльд бүх нийтийн эсэргүүцлийн хөдөлгөөн эхэлж энэ үеэр сөрөг хүчин олонх парламентын спикер Хуан Гуайдо өөрийгөө түр цагийн ерөнхийлөгч гэж зарласан юм. АНУ тэргүүтэй барууны орнууд түүнийг ерөнхийлөгч хэмээн хүлээн зөвшөөрч байгаа бол ОХУ, Куба зэрэг орнууд Николас Мадурог дэмжиж байгаа.

эх сурвалж :"Ардчилал таймс сонин"