Орос, АНУ, Саудын Араб улсууд хамтраад дэлхий дахины газрын тосны зах зээлд үүсээд байгаа нөхцөл байдлаас гарах арга замыг хайх ёстой гэж АНУ-ын Ерөнхийлөгч Дональд Трамп Цагаан ордонд хийлгэсэн хэвлэлийн мэдээлэлд мэдэгджээ. “Би энэ талаар Ерөнхийлөгч В.Путинтэй, мөн Саудын Арабын үе залгамжлагч хунтайж Мухаммед бен Сальман Аль Саудтай ярьсан. Бид хамтраад нөхцөл байдлыг судлаад юу хийж чадахаа харъя. Яагаад гэвэл бид үүнээс болж бүхэл бүтэн салбараа алдахыг хүсэхгүй байна” гэж Д.Трамп онцолсон байна. Түүнийхээр нефтийн үнэ унаж байгаа нь америкчуудад ашигтай гэнэ. “Хүмүүс нэг галлон буюу 3.8 литр бензинийг 99 центээр авна. Энэ бол олон хүнд, агаарын тээврийнхэнд ашигтай” гэжээ. “Гэхдээ энэ бол манай хамгийн том, нефтийн салбарт хор нөлөөтэй. Нэг үгээр хэлбэл ёстой утгагүй зүйл” гэсэн байна. “Үүнээс болж бид бүхэл бүтэн салбараа, мянга мянган ажлын байраа алдана” гэж АНУ-ын тэргүүн онцлон тэмдэглэсэн байна. Газрын тос экспортлогч орнуудын байгууллагаас Орос, Саудын Арабтай нефть олборлох хэмжээг бууруулах замаар баррель нефтийн үнийг гурван жилийн хугацаанд 60 ам.доллар байлгах тухай хэлэлцээр байр суурийн зөрүүгээс болон тасалдсанаас дэлхийн зах зээл дээр нефтийн үнэ эрс буурсан. 

эх сурвалж :"Ардчилал таймс сонин"