Шинэ коронавирусийн халдвар авсан  Их Британийн ерөнхий сайд Борис Жонсоны бие муудаж, эрчимт эмчилгээний тасагт шилжсэн байна. тэрээр коронавирусийн халдвар авсан нь батлагдсанаас хойш 10 хоног гэртээ тусгаарлагдсан ч бие нь дээрдэхгүй байсаар эмнэлэгт хүргэгдсэн гэж Их Британийн засгийн газар даваа гарагт мэдээлэв.

Борис Жонсон гадаад хэргийн сайд Доминик Раабыг шаардлагатай үед ерөнхий сайдын үүргийг орлон гүйцэтгэх төлөөлөгчөөр томилсон байна. Их Британийн хатан хаан ерөнхий сайдын биеийн байдлын талаар байнга мэдээлэл авч байгаа талаар Букингэмийн ордон мэдээлсэн юм.

Түүний сүйт бүсгүй Кэрри Саймондс бие давхар бөгөөд ирэх зуны эхээр амаржих аж. Дэлхийн улс орнуудын удирдагчид Борис Жонсоныг хурдан эдгэрэхийг хүсэж байгаагаа илэрхийлсээр байна. Тухайлбал, АНУ-ын ерөнхийлөгч Дональд Трамп Америкчууд Жонсоны эрүүл мэндийн төлөө залбирч байгааг мэдэгджээ. Тэрбээр Жонсоныг “хэзээ ч бууж өгдөггүй”, “хүчтэй” хүн хэмээн тодорхойлсон байна.

Эх сурвалж: BBC