Америкийн Сиэтл дэх Вашингтоны их сургуулийн Эрүүл мэндийн хэмжил зүй, үнэлгээний хүрээлэн шинэ төрлийн коронавирус COVID-19-ийн халдварын тархалт дэлхийн улс орнуудад хэзээ хамгийн ид үедээ хүрэхийг таамаглан гаргалаа хэмээн Deutsche Welle хэвлэл мэдээллээ. Эндхийн мэргэжилтнүүдийн бичсэнээр Европ тивд хамгийн их нас баралт дөрөвдүгээр сарын гурав дахь долоо хоногт тохионо, Испани, Италид бол бүр эхэлчхээд байна гээд Европын 151 мянга гаруй хүн энэ халдварын улмаас нас барах бол АНУ-д 81 мянган хүн нас барна гэжээ.
Их Британид наймдугаар сар гэхэд 66 мянган хүн коронавирусийн халдвараар нас барах бол энэ аймшиг дөрөвдүгээр сарын 17-ноос эхэлнэ гэсэн байна. Германд олноор үхэх аюул дөрөвдүгээр сарын 19-нөөс эхэлж нийт 9000 хүн амь үрэгдэнэ гэжээ. Их Британи, Герман, Норвеги, Грек бол өнөөдөр эрт үедээ байгаа бол Нидерланд, Ирланд, Австри, Люксембург улсууд аюулын ирмэгт ойрхон байна гэнэ.
Олон улсын зөвлөх Boston Consulting Group (BCG) компани бас коронавирусийн халдварын тархалтын ид үе АНУ, Герман, Орост тавдугаар сарын эхээр тохиож хөл хорионы дэглэм зургадугаар сарын сүүлч, долдугаар сарын эхээр дуусна гэжээ. Харин Их Британид халдварын ид тархалт хаврын сүүлчийн долоо хоногоор тохиох бол Өмнөд Америкт зургадугаар сард эхэлж хөл хорио зуны сүүлчээр эцэс болно гэсэн байна.
ОХУ-ын Холбооны эмнэлэг биологийн агентлагийн тэргүүн Вероника Скворцова “Россия-24” телевизээр ярихдаа коронавирусийн ид тархалтын үеэс гарахад Орост дахиад 14 хоног дутуу байна гэсэн байна. Орост энэ өвчнөөр өвчлөгсөдийн тоо хоногт 18-20 хувиар нэмэгдэж байна гэжээ.

эх сурвалж :"Ардчилал таймс сонин"