Шинэ төрлийн коронавирусийн халдвар тархсан нь Хятадын Ухань хот дахь лабораториос вирус алдагдсантай холбоотой хэмээн Их Британийн тагнуулынхан үзэж байна хэмээн Daily Mail хэвлэл мэдээллээ. Хубэй муж дахь Ухань хотод Вирус судлалын хүрээлэн Уханийн өвчинд тавих хяналтын төв байдаг нь амьтад, ялангуяа сарьсан багваахай дээр туршилт хийдэг байсан гэж хэвлэлд бичсэнийг “Комсомольская правда” дамжуулсан байна.
Америкийн эрдэмтэн, биологийн аюулгүй байдлын шинжээч, профессор Ричард Эбрайт бас Хятадын энэ лабораторийн ажилтнууд вирус судлалын ажил хийхдээ техникийн аюулгүй байдал нь бүрэн хангагдаагүй байдгийг биеэр харсан гэж ярьсан байдаг. Тэрбээр “Ийм туршилт хийхэд аюулгүй байдал, хамгаалалтын түвшин “дөрөвдүгээр” зэрэгт байх ёстой, харин Хятадын эрдэмтдийнх дөнгөж “хоёрдугаар” зэргийнх байна, энэ чинь халдвараас сэргийлэх хамгийн бага зэрэглэлийн хамгаалалт” гэж ярьжээ.
Коронавирусийн халдвар тархсан талаарх Британийн тагнуулынхны энэ таамгийн талаар Хятадын эрх баригчид хараахан тайлбар өгөөгүй байна. Оросын вирус судлаач Виктор Зуев үүний өмнө коронавирус COVID-19, Хонконг ханиад, Испанийн ханиад зэрэг халдварт өвчин Хятадаас эхлэн дэлгэрээд байгаа нь Хятадын цаг агаар, хүн амын нягтрал, хятад хүмүүсийн аж амьдралын хэвшилтэй холбоотой хэмээн тайлбарлаж байсан.

эх сурвалж :"Ардчилал таймс сонин"