ОХУ-ын нийслэл Москва хотын Никулины шүүх “Медуза” хэвлэлийн сэтгүүлч Иван Голувиныг хар тамхи, мансууруулах бодис наймаалахыг завдсан хэргийн төлөө гэрийн хорионд суулгалаа гэж РИА Новости агентлагийн сурвалжлагч мэдээлсэн байна. Түүнийг гэрийн хорионд наймдугаар сарын 7-ны өдөр хүртэл хоёр сарын хугацаатай суулгахаар шүүхийн танхимаас суллажээ. Өмгөөлөгч нь түүнийг баривчлах юм бол хүч хэрэглэж болзошгүй хэмээн болгоомжлон зүтгэсний хүчинд сэтгүүлч гэрийн хорионд суух болсон байна.
“Цагдаагийн хэлтэст хүчний байгууллагынхан сэтгүүлчид халдаж хоёр ч удаа нүүр лүү нь бас толгой руу нь цохиж эрүүг нь гэмэсний улмаас миний үйлчлүүлэгч чухам юу болсон талаар санахгүй болсон” гэж шүүх хуралдаан дээр өмгөөлөгч нь мэдэгджээ.
Сэжигтэн сэтгүүлч ч бас өөрийн буруугүйг нотлохын тулд мөрдөн байцаах ажилд тусална гэдгээ илэрхийлээд “Би хэзээ ч хар тамхи хэрэглэж байгаагүй” гэж мэдүүлжээ. Шүүхээс түүнийг гадаад паспорттой болохоор мөрдөн байцаалтаас зугтаан нуугдаж болзошгүй хэмээн сэжиглэсэн юм байна.

Сэтгүүлч Голуваны хэрэг

Сэтгүүлч Голуваныг хар тамхи, мансууруулах бодис наймаалахыг оролдсон хэрэгт сэжиглэн өнгөрсөн бямба гарагт саатуулсан юм байна. Голуваны байрнаас үүргэвчинд хийсэн таван боодол хар тамхи олдсоноор түүнийг Москва хот болон Москва орчимд хар тамхи наймаалдаг гэмт хэргийн бүлэглэлтэй хамтран ажилладаг хэмээн шалгаж эхэлсэн юм. Харин сэтгүүлч болохоор хар тамхийг надад өгөөш болгож хаяж өгсөн гэж мэдүүлж байжээ. Сэтгүүлчийн гэрээс бас хар тамхи үйлдвэрлэдэг төхөөрөмж илэрсэн хэмээн Дотоод явдлын яамны албан ёсны сайтад хэд хэдэн гэрэл зураг байрлуулсан нь энэ хэрэг олны анхааралд өртөж дуулиан болсон юм. Гэхдээ дараа нь цагдаагийнхан Голуваны гэрт ганц зургийг нь л авсан, бусад нь хар тамхины гэмт хэрэгтнүүдийн бүлэглэлд хамаатай зураг байсан гэж мэдэгджээ. Эндээс эхэлж сэтгүүлчийг мөрдөн шалгаж эхэлсэн юм байна. Цагдаагийнхан бас сэтгүүлчийг саатуулсан үедээ хүч хэрэглэсэн гэдгийг ч няцааж байна.
Москвагийн мэр Сергей Собянины хүсэлтээр нийслэлийн Дотоод явдлын газрын дарга мөрдөн байцаах ажлыг өөрийн хяналтдаа авчээ. Хүний эрхийн байгууллагууд ч нийслэлийн Дотоод явдлын газарт хүсэлт гаргаж хэргийг үнэн зөв мөрдөх, цагдаагийнхныг хууль ёсны дагуу ажиллахыг хүсчээ.